Тываның Баштыңы Донецк хоорайда дүүштүрүлге төвүнге четкен

Тываның Баштыңы тускай шериг операция зоназынга сөөлгү ажыл-агыйжы чоруунуң үезинде Донецк Улус Республиканың Донецк хоорайында чыл ажыг ажылдап турар Чаңгыс аай дүүштүрүлге төвүнүң салбырынга четкен. Владислав Ховалыгның айтыышкыны-биле чоокта чаа Донда Ростов хоорайга база бир ындыг салбыр ажыттынган. Бо черлер чоок улузун дилеп азы эмнелгеде дайынчыларны ажаап-карактаары-биле келген кижилерни, ооң иштинде республикадан келгеннерни хүлээп турар.
Владислав Ховалыг Донецкиде Чаңгыс аай дүүштүрүлге төвүнүң салбырынга чорааш, шериг кезектериниң командирлери болгаш шериг албанныглары-биле ужурашкан. Республиканың Баштыңы 55-ки гвардейжи мото-адыгжы бригаданың тургустунганындан бээр 10 чылдааны база Кутузов ордени-биле шаңнатканы дээш, ооң дайынчыларынга байырны чедирген. Владислав Ховалыг шериглер-биле янзы-бүрү айтырыгларны, ооң иштинде аңгы-аңгы шериг кезектеринден болгаш бөлүктерден дайынчыларның техниктиг хандырылгазын база сайгарып чугаалашкан.
Владислав Ховалыг гуманитарлыг ачы-дуза чыылдазын канчаар организастаанын база «Деткимче» фондузунуң тускай шериг операциязының киржикчилеринге доктаамал дузалажып турар инвесторларның үлүүн тайылбырлаан. «Немелде техниктиг дериг-херексел дээш аңгы-аңгы айтырыгларны сайгардывыс. Болдунар шаа-биле дериг-херекселди доктаамал чорудуп турар бис. Дузаламчы чедер черинге чедип турар. Чагыглар ёзугаар дорт ажылдап турар «Деткимче» фондузун четчележип, бүгү харыысалганы билип турар инвесторларывыстың дугайында дайынчыларга чугааладым» – деп, Тываның Баштыңы шериглер-биле чугаазының соонда бодунуң блогунда бижээн.
Владислав Ховалыг 55-ки гвардейжи мото-адыгжы бригаданың баазазынга чаа-ла чорааш, Курск, Белгород, Запорожье угланыышкыннарда база Луганск Улус Республикада дайынчы даалгалар күүседип турар бригаданың командылал составынга база шериг албанныгларынга техниктиг дериг-херекселдерни – квадрокоптерлерни, дроннар детекторларын, дизельдиг генераторларны болгаш мотоциклдерни дамчыткан. Шериглерниң дилээ ёзугаар «Деткимче» фондузу ниитизи-биле 90 хире эң херек дериг-херекселдерни дамчыткан. Инвесторларның, сайгарлыкчыларның, бюджет организацияларының, республиканың чурттакчыларының акша-хөреңгизи-биле фонд доктаамал долдуртунуп турар.
Донецкиде Чаңгыс аай дүүштүрүлге төвүнүң ажылдакчылары төптүң амгы ажылын республика Баштыңынга таныштырган. Баазаның командири Отчугаш Күжүгеттиң дыңнатканы-биле алырга, бо хүнде төпте 6 кижи чедип келген. Өг-бүлелерниң бирээзи бир ай ажыг чеде берген, олар ачазын сураглап дилеп турар. Төптүң ажылдакчылары Командирлер чөвүлели таварыштыр чоок кижизиниң дугайында медээлерни алырынга дузалажып турар.
Тываның Баштыңы чедип кээрге, Командирлер чөвүлелиниң кежигүннери болгаш өске-даа шериглер чыглып келген. Дайынчылар төрээн республиказындан ТШО зоназынче доктаамал кээп турар гуманитарлыг дуза, техниктиг курлавырлар, хууда посылкалар дээш өөрүп четтиргенин илереткеннер.
«Деткимче» регионалдыг фонд Донда Ростов хоорайда Чаңгыс аай дүүштүрүлге төвүнүң салбырының ажылын база хайгаарап турар. Ийи каът бажыңда төп келген кижилерге чеди орунну дерип белеткээн. Чурттаарынга таарымчалыг бүгү чүүлдер бар. Аъш-чем болгаш паш-сава төпте кезээде турар.
Төпке чурттаар чагыгны дараазында телефоннар дамчыштыр арттырып болур: +7 929-316-61-85 (Светлана), +7 928-226-47-71 (Марина) азы +7 923-540-19-58 (Артыш). Төптүң ажылдакчылары, херек апарза, вокзалдан төпче халас автобусту организастап болур. Төптүң салбырында санал-оналдар ному бар.
А. МОНГУШ.
Чурукту ТР-ниң Чазааның парлалга албанындан алган.
“Шын” №43 2025 чылдың ноябрь 6