Регионалдыг диспетчер албанының дыңнатканы болза, май 7-де эртенгиниң 8.00 шакка чедир, Тывада чеди арга-арыг өрттери хып турган, оларның ниити шөлү 2959 га. Чадаананың, Туранның, Шагаан-Арыгның, Каа-Хемниң, Таңдының, Барыын-Хемчиктиң арга-арыг черлеринде тайгалар өрттенип турар. Эң улуг өрттер Чадаананың арга-арыг ажыл-агыйының Сүт-Хөл (өрттүң шөлү 1000 га ашкан), Бүрен-Бай-Хаак (610 га), Туран (599 га), Бай-Хаак (182 га) арга-арыг участоктарында болуп турар.
Май 6-да Тываның Баштыңы чурттакчылыг черлерже эң-не чоок өрт хып турар Таңды кожуунга четкен. Кижилерниң хайы-биле өрттер үнгени баш бурунгаар билдинген. Регионнуң удуртукчузу оперативтиг штабка четкен. Чурттакчылыг черлерже – Бай-Хаак, Дүрген, Сосновка суурларже чоокшулаан өрт айыылын чайлаткан. 246 кижи болгаш он-он техника ында ажылдап турар. Күштүг хат болгаш чедери берге черлер өрт өжүрер ажылды бергедедип турар. Онза байдалдар яамызы база регионалдыг авиаарга-арыг камгалал албаны-биле кады Хакасиядан эки турачы дружиналар, тус черниң чурттакчылары, өртчүлер ажылдап турар. Изиг аъш-чем болгаш суг-биле хандыртынган.
Чүгле эрткен хүннүң дургузунда Чербиниң арга-арыг ажыл-агыйының участогунда ниитизи-биле 30 га черге хып турган өрт өжүртүнген.
Тываның Арга-арыг яамызының курлавырында 105 кижи болгаш 74 техника бар. Регионнуң девискээринде арга-арыг өрттерин өжүржүр дээш «Авиаарга-арыг камгалалының» Красноярск биле Абаканның авиация салбырларның чүс ажыг ажылдакчылары келген.
2026 чылдың өрт сезону эгелээнден бээр Тывада ниитизи-биле 3978,24 га шөлдүг 36 арга-арыг өрттери бүрүткеттинген. Оларның 34-ү арга-арыг фондузунуң черлеринге база 2-зи федералдыг ужур-дузалыг онза камгалалдыг бойдус девискээрлеринге («Убсунур ыйгылаажы» заповедник) болган.
Республикада өртке удур айыыл чок чоруктуң тускай чуруму апрель 15-тен эгелеп күш киргенин регион Чазааның доктаалы-биле доктааткан, ында хамаатыларның база транспорт аймааның арга-арыгже кирерин бүрүнү-биле хораанын сагындыраал. Май 4-тен эгелеп, өрттерниң нарыыдааны болгаш агаар-бойдустуң баксырааны-биле, регионнуң арга-арыгларында онза байдал чарлаттынган. Тываның Баштыңы социал четкилерде бодунуң арыннарында чаңгыс чер чурттугларынга кыйгырыгны кылган.
«Кижи бүрүзүнден өртке удур айыыл чок чоруктуң дүрүмнерин шыңгыы сагыырын, бойдусту болгаш бажыңнарын камнаарын дилээр-дир мен. Бичии-даа серемчилел чок чорук улуг каражага чедирип болур» - деп, Владислав Ховалыг сагындырган.