Тываның Баштыңы декабрь 25-те Кремльдиң «Күзелдер ёлказындан» 11 харлыг Екатеринаның ыдык күзелин бижээн открытканы тырттып алган. Уругга Соок-Ирей келгеш, Владислав Ховалыгдан чоруткан белек – бичии чурукчунуң дилээни ёзугаар янзы-бүрү өңнерлиг чуруттунар будуктарны дамчыткан.
Владислав Ховалыг бодунуң телеграм-каналынга, Тываның Баштыңының тускай шериг операцияларының талазы-биле тускай төлээзи Тимур Куулар Соок-Ирей кылдыр хуулуп алгаш, Екатеринага Чаа чылдың тускай белээн чедирип турар видеороликти салган.
«Бөгүн тоолчургу Соок-Ирей — тускай шериг операциязының талазы-биле төлээм Тимур Куулар Екатеринага албан-биле аалдап четкеш, менден белекти берген. Уругларга тоолчургу чүүлдерге бүзүрелди бээри, оларның күзелдерин боттандырары дээрге, ылаңгыя мындыг берге үеде бистиң ниити хүлээлгевис-тир» — деп, Тываның Баштыңы видеону тайылбырлап тургаш демдеглээн.
Луганск Улус Республикага Тимур Кууларның Соок-Ирей болуп хуулганы бирги таварылга эвес-тир. Эрткен чылын Владислав Ховалыгның дилээ-биле ооң командазы «Күзелдер ёлказы» деп акцияга киришкен элээн каш уругларга Чаа чылдың белектерин чедирген. Регионнуң Баштыңы база Тыва Чазактың кежигүннери ЛУР-нуң Свердловск муниципалдыг районундан сес харлыг Алешаның, 14 харлыг Оляның, 11 харлыг Соняның база Валерияның күзелдерин боттандырган.
«Күзелдер ёлказы» бүгү-российжи акция 2018 чылдан бээр онза хереглелдиг уругларның Чаа чылда күзелдерин күүсетчип берип турар. Луганск биле Донецк Улус Республикаларда, Запорожье биле Херсон областар девискээрлеринде тускай шериг операциязында киржип турар шериг албанныгларның база ында чурттап турарларның өг-бүлелеринден ажы-төлүнче онза кичээнгейни салып турар.
ТР-ниң Чазааның парлалга албаны.