Москвага ажылчын аян-чорук үезинде Владислав Ховалыг «МегаФон» компанияның удуртулгазы-биле ужурашкан. Ийи тала бо чылдың июньда Санкт-Петербургтуң делегей чергелиг экономиктиг шуулганга чарган дугуржулга езугаар республиканың ыраккы чурттакчылыг черлерин дүрген дамчыыр Интернет-биле хандырарынче угланган элээн каш төлевилелдерниң күүселдезин база регионга «Айыыл чок хоорай» аппарат-программа комплекизин киирерин чугаалашкан.
Тываның Баштыңы-биле ужуражылгага корпоративтиг болгаш күрүне секторун хөгжүдериниң коммерциялыг директору Эмин Антонян, национал төлевилелдер департаментизиниң директору Александр Калошин база «МегаФон» компанияның Сибирь болгаш Ыраккы Чөөн чүк регионнарында корпоративтиг болгаш күрүне бизнезин хөгжүдер талазы-биле директору Артем Базыль киришкеннер.
«Бистиң республикавысты амгы үении болгаш айыыл чок кылыптар чугула төлевилелдер күүселдезин сайгардывыс. Чугаалажыышкыннар үезинде «Айыыл чок хоорай» төлевилелдиң бирги чадазын акшаландырарының айтырыын сайгарып көрдүвүс, ылаңгыя IV делегей чергелиг буддийжи шуулганның бүдүүзүнде ону дүргедедири чугула херек. Республиканың Кара-Хөл, Кызыл-Хая, Куңгуртуг дээн ышкаш ыраккы суурларынче волокно-оптиктиг харылзаа шугумнарын шөйериниң орук картазын тургузарын база чугаалажып сайгардывыс» - деп, Владислав Ховалыг бодунуң телеграм-каналында дыңнаткан.
Санкт-Петербургтуң делегей чергелиг экономиктиг шуулганынга чедип алган дугуржулгаларны хөгжүдеринче, ол ышкаш 2025 чылдың ноябрь 26-да Кызылга Хакасия болгаш Тыва республикаларда «МегаФон» ПАН-ның директору Светлана Симаткина биле Сибирь болгаш Ыраккы чөөн чүк регионнарында корпоративтиг болгаш күрүне бизнезин хөгжүдер талазы-биле директору Артём Базыльдың ужуражылгазының түңнелдери-биле, «Айыыл чок хоорай» аппарат-программалыг комплекстиң бирги чадазын Тыва Республиканың девискээринге боттандырар дугайында шиитпир хүлээп алдынганын сагындыраал. 2026 чылдан эгелеп чогуур чурагай инфраструктуразын тургузар хемчеглерни чада аайы-биле акшаландырары планнаттынган.
Россия Федерациязының Чазааның айтыышкыны-биле харылзаа хандырылгазының чедери берге чурттакчылыг черлер даңзызынче Тываның үш чурттакчылыг черлери — Бай-Тайга кожууннуң Кара-Хөл, Мөңгүн-Тайга кожууннуң Кызыл-Хая база Тере-Хөл кожууннуң Куңгуртуг суурларны киирген. 1 муң ажыг чурттакчылыг ол суурлар республикада волокно-оптиктиг харылзаа чок черлер болуп турар. Делегейниң кайы-даа булуңунга дүрген интернетти ажыглап болур «Бюро 1440» деп адаккы орбита бөлүүнүң баазазынга 400 хире оптиктиг харылзаа шугумун шөйүп болур.
Федералдыг акша-хөреңги болгаш республика бюджединиң кады акшаландырыышкыны-биле оптиктиг харылзаа шугумун шөйүп кожар. Тываның Чазаа регионалдыг күрүне программазынга кады акшаландырыышкын кылдыр 5,2 сая рубльди тускайлаан. «МегаФон» ПАН-биле кады оптиктиг харылзаа шугумунуң төлевилелин кады боттандырарының орук картазын ажылдап кылыры чугула.
«Бо кады ажылдажылга чүгле Тываның чурттакчыларының болгаш аалчыларның айыыл чок чоруун экижидер эвес, а эң-не ыраккы чурттакчылыг черлеринге безин бедик шынарлыг харылзааны хандырар. Ындыг дугуржулгалар чурагайлыг шилчилгеже болгаш республикада амыдыралдың шынарын бедидеринче чугула базым болур» - деп, Тываның Баштыңы ужуражылганың түңнелинде демдеглээн.
ТР-ниң Чазааның парлалга албаны.