«Шын» 12+

Тываның Баштыңы Моолдуң элчини-биле ужурашкан

19 ноября 2026
3

Тываның Баштыңы Владислав Ховалыг Москвага сургакчылаашкын үезинде Россияда Моолдуң Онза болгаш бүрүн эргелиг элчини Дуламсүрэңгийн Даваа-биле ужурашкан. Ол дугайында Республиканың Баштыңы МАХ-та бодунуң каналында дыңнаткан.

Владислав Ховалыг элчинниң албан-дужаалга томуйлаттынганы-биле байыр чедиргеш, ооң удуртулгазы-биле чурттар болгаш регионнар аразында кады ажылдажылга чаа күштү алыр дээрзинге бүзүрелин илереткен. Ужуражылга конструктивтиг болгаш найыралдыг болуп эрткен.

«Тыва – моол кады ажылдажылгага хамаарышкан элээн хөй айтырыгларны сайгарып көрдүвүс. Туризм адырын хөгжүдериниң дугайында аңгы көрдүвүс: Тываның болгаш кожа-хелбээ аймактарның төөгүлүг, культурлуг болгаш шажын-чүдүлге төптерин харылзаштырып турар кызыгаарлар аразының маршруттарын тургузарын сайгарган бис. Медицина талазы-биле кады ажылдажылганың келир үезинге база доктаадывыс. Ол дээрге тускай мергежилдиң кижилериниң солчулгазы болгаш шагда-ла бистиң кожаларывыстың чедиишкинниг ажыглап келгени сарыг шажынчы чаңчылчаан арга-дуржулгаларын киирери болур» – деп, Тываның Баштыңы чугаалаан.

Моол Тываның үр үе дургузунда бүзүрелдиг партнёру дээрзин ол онзалап демдеглээн. А республика ол чоокшулажыышкынны экономикадан эгелээш, гуманитарлыг харылзааларга чедир бүгү-ле адырларга ханыладыр сорулгалыг. «Ноябрьның эгезинде Россия биле Моолдуң аразында дипломатчы харылзааларның 105 чылын демдеглеп эрттирдивис, ол чүүл бистиң ужуражылгавыска онзагай чүүлдү демдеглеп турар»– деп, Владислав Ховалыг немээн.

Чуруктарны В. Ховалыгның социал четкиде арнындан алган.

«Шын» №45 2026 чылдың ноябрь 19

"Шын" солуннуң МАХ-каналынга каттыжыңар: max.ru/channel_shyn

ШЫН Редакция