Дүүн, май 4-те, РФ-тиң Транспорт яамызының Агаар транспортунуң федералдыг агентилели — Росавиацияның удуртукчузунуң оралакчызы Георгий Бахарев ажылчын сургакчылаашкын-биле Тывага келгеш, Кызылдың аэропортунда транспорттуң (авиацияның) айыыл чок чоруунуң хандырылгазын хынап көрген.
Росавиацияның оралакчы даргазы Тыва Республиканың төвүнде аэропортта агаар эрттирилге пунктузу кайы хире дериттинип, чаартынып турарын хынаан. Тудуг организациязы объектини план езугаар бо чылдың декабрьда дужаар дээш, шудургу ажылдап турар.
Бүдүрүлгениң чиңгине директеру О. Бады аэропорттуң өртке удур айыыл чок чоруунуң камгалалын үшкү категориядан бешки чадаже киирер дээн ажылдарын илеткеп, таныштырган.
Ажылчы сургакчылаашкын үезинде Росавиация албанының даргазының оралакчызы Георгий Бахарев Тываның Баштыңы Владислав Ховалыг-биле ужуражып, Тыва Республикада авиааргыжылганы хөгжүдер, Кызылдың аэропортун эде чаартыр, инфраструктура объектизинде транспорттуң (ужудулганың) айыыл чок чоруун бедидер ажылдар дугайында сайгарып чугаалашкан.
Бүдүрүлге авиацияның айыыл чок чоруун экижидер дээш улуг ажылдарны кылганын албанның оралакчы даргазы дыңнаткан. Тываның Баштыңы Владислав Ховалыг "чогуур негелделерге дүгжүп турар" деп түңнелди алыр дээш, күжениишкинниг ажылдап турарын чугаалаан.
«Ону алырының белеткел ажылдары чоруп турар. Чогуур негелделерже бүгү күжениишкинеривисти салыр бис. Ажылды декабрьда доозуп, Улан-Батор, Урумчи уунче солун саналдарны көрүп тур бис. Алызында Пекинче ужудар план база бар» — деп, Тываның Баштыңы чугаалаан.
Бо чылдың июльдуң 1-ден Кызылдың аэропортундан Красноярскыже дыштаныр хүннүң рейстери ужуп эгелээрин дыңнаткан.
«КрасАвиа»-биле дугуржулга бар. Сертификатты аптарывыска, регионче «Сибирь» (S7) авиакомпания кирип кээр чадавас» — деп, Владислав Ховалыг чугаалаан.
Тыва Республикага авиааргыжылганы хөгжүдеринче угланган кады ажылдажылгазын уламчылаар деп ийи тала дугурушкан.
Тываның Чазааның парлалга албаны.