Владислав Ховалыг Москвага ажылчын сургакчылаашкын үезинде Кыдат Улус Республиканың Россияда онза болгаш бүрүн эргелиг элчини Чжан Ханьхуэй-биле ужурашкан. Ийи тала 2026 чылда Тывага болуп эртер IV Делегей чергелиг буддийжи шуулганга кыдат делегацияның киржилгезин чугаалашкан. Ол ышкаш Тываны таварыштыр Моол болгаш Кыдатче транспорт коридорун хөгжүдериниң перспективаларын база сайгарган.
Владислав Ховалыг Россияда Кыдат Улус Республиканың онза болгаш бүрүн эргелиг элчини Чжан Ханьхуэйни IV Делегей чергелиг буддийжи шуулганның аалчызы кылдыр Тываже чалаан. XIX чүс чылдың төнчүзүнде болгаш XX вектиң эгезинде Үстүү-Хүрээ хүрээзинге сүлде-сүзүк болгаш организастыг деткимчени берип турган Лавран Таши Кьил хүрээзи-биле (拉卜楞寺) Тываның аразында шажынчы болгаш культура харылзааларын демдеглээн.
Тываның Баштыңы ийи хүрээниң шажынчы ниити харылзааларын барымдаалап, Тывага мооң мурнунда аалдап чораан, катап бодараан буддийжи башкыларны кыдат делегацияның составынче киирерин Кыдат Улус Республиканың онза болгаш бүрүн эргелиг элчининден дилээн. Владислав Ховалыгның бодалы-биле алырга, кыдат шажын баштыңнарының аалдап келири ниити шажын чүдүлгеге хүндүткелдиң илередии болур.
Ийи тала Россияның, Моолдуң болгаш Кыдаттың регионнарының аразынга транспорт коридорун хөгжүдер планнарны сайгарып тура, чер болгаш агаар харылзажылга аргаларын өөренип көрген. Дээрги элчин барыын Кыдатта эң улуг транспорт төвү Урумчи хоорайже үнериниң ажыктыын айтып, авиа-аргыжылганы организастаар аргаларны өөренип көөр күзелин илереткен.
Владислав Ховалыг бодунуң ээлчээнде Сибирь регионнары — Красноярск край, Хакас Республика болгаш Тываның деткип турары төлевилел Төп-Евразийжи транспорт коридорунуң Тываны таварыштыр эртер демир-оруун тударының алыс кедизин таныштырган. Бо хүнде Төп-Евразийжи транспорт коридорун тургузарының баш бурунгаар техниктиг-экономиктиг үндезининиң шинчилелдери доозулган. Төп-Евразийжи транспорт коридорунуң чүък баазазының перспективазын санаарынче «Стратегтиг шинчилелдер төвү» фонд кирген.
«Кыдат – бистиң чурттуң стратегтиг партнёру-дур, ынчангаш экономика, культура болгаш эртемни хаара туткан комплекстиг кады эштежилгени тургузары биске чугула бооп турар» — деп, Владислав Ховалыг ужуражылга соонда бодунуң телеграм каналынга бижээн.
А.МОНГУШ.
Чурукту ТР-ниң Чазааның парлалга албанындан алган.