Республиканың Баштыңы Владислав Ховалыг регионнуң «Тываның маадырлары» төлевилелиниң бодунуң хайгааралында турар киржикчизи-биле ээлчеглиг ужуражылганы эрттирген.
«Тываның маадырлары» деп улуг хемчээлдиг регионнуң эгелээшкинин боттандырары-биле Тываның Баштыңы Владислав Ховалыг биле Россияның Маадыры Буян Кууларның ужуражылгазы болган. Болуп эрткен чугаа Тываның кадрлар курлавырын белеткээр системаны сайзырадырының чугула чадазы болуп, чаңгыс чер чурттугларывыстың арга-шинээн ажыдарынче угланган онзагай төлевилелдиң ажыктыын көргүскен.
«Тываның маадырлары» программа — чүгле кадрлар төлевилели эвес, а регионнуң удуртукчуларының чаа салгалын хевирлээр стратегтиг эгелээшкин. Программаның киржикчилери сентябрь 15-те эгелээн дагдыныкчылар-биле стажировказының бирги чадазын декабрь 5-те дооскан. Программаның кол сорулгазы – бедик чедиишкиннерлиг болгаш удуртукчу шынарлыг кижилерни тодарадып, оларга күрүне болгаш тус чер эргелеп-башкарар шугумга профессионал өзүлдениң аргаларын бээри.
«Тываның маадырлары» регионалдыг программада дагдыныкчызы болуп турарым Россияның Маадыры Буян Куулар-биле ужураштым. Буян Федорович республиканың Аныяктар херектериниң яамызынга стажировказын эрткеш, ажылының түңнелдери-биле үлешкен. Аныяктар политиказынче шымнып киргенин, амгы үеде тургустунуп келген бергедээшкиннер болгаш аргалар дугайында бодалдарын, бистиң регионда аныяктар-биле ажылды хөгжүдер талазы-биле ооң санал-оналдарын дыңнаары солун болду» — деп, Тываның Баштыңы чугаалаан.
Мындыг ужуражылгалар программаның киржикчилериниң чедиишкиннерин болгаш нарын айтырыгларны шиитпирлээринге кайы хире беленин үнелеп көөр арганы бээр дээрзин регионнуң удуртукчузу демдеглээн. Ол ышкаш аңгы-аңгы салгалдарның удуртукчуларының аразында Тываның келир үезиниң ниити көрүжүн хевирлээринге дузалаар. Буян Кууларның Тываның келир үези дээш сеткилинден сонуургалы программаны дооскан соонда, регионга ачы-дузалыг нарын айтырыгларны шиитпирлеп шыдаар үре-түңнелдиг удуртукчу болурунга идегелди берип турарын республиканың Баштыңы бодунуң блогунда демдеглээн.
Россияның Маадыры, “Тываның маадырлары” программаның киржикчизи Буян Куулар Тываның Баштыңы-биле ужуражылгазын тайылбырлаан: “Владислав Товарищтайович Тываның Баштыңы албан-дужаалының ажыл-чорудулгазының түңнелдерин меңээ чугаалап база көргүзүп берди. Ол ышкаш келир үеже бодунуң көрүжү-биле үлежип, республиканы бурунгаар хөгжүдер хемчеглер дугайында база чугаалады. Ооң ажыл-ижи-биле танышкаш, тодаргай билиг, дуржулга база харыысалга негээр улуг болгаш берге ажыл-дыр деп билдим”.
«Тываның маадырлары» программа — чүгле хууда кижилерже инвестиция эвес, а ниити ажыл-херекче кижи бүрүзү үлүг-хуузун киирип болур республиканың үр үеде хөгжүлдезиниң стратегиязының тодаргай чижээн көргүзүп турар. Программаның киржикчилери декабрь 8-тен 18-ке чедир өөредилгезиниң ийиги кезээнде катап чыглыр.
Бистиң корр.
Чуруктарны ТР-ниң Чазааның парлалга албанындан алган.
“Шын” №48 2025 чылдың декабрь 11