Тываның Баштыңы шахтерларның профессионал байырлалын таварыштыр байырын чедирген

Бөгүн Россияда шахтерлар хүнүн демдеглеп турар. Байырлал таварыштыр Тываның Баштыңы Владислав Ховалыг шахтерларга байыр чедириишкинин чоруткан:

“Тываның даг-руда компаниязының болгаш Межегейуголь коллективтеринге профессионал байырлалын таварыштыр изиг байырны чедирип тур мен! Силерниң чымыштыг ажыл-ижиңерниң, күш-ажылыңарга бердинген чорууңарның ачызында бистиң республиканың хөмүр-даш казар салбыры сайзырап, ооң экономиктиг болгаш бүдүрүкчү күш-шыдалы улам өзүп орар. Тываның социал-экономиктиг хөгжүлдезинге киирип турар күш-ажылыңарны бедии-биле үнелеп тур мен. Силерге быжыг кадыкшылды, тайбыңны болгаш чаагай чолду күзедим!

Россияның энергетика сайыды Сергей Евгеньевич Цивилевка бо байырлал хүнүнде өөрүп четтиргенимни илередип, изиг байырымны чедирдим. Ол хөй чылдар дургузунда чурттуң хөмүр-даш тывыжының төвү – Кузбассты билдилии-биле удуртуп келген. Оон аңгыда, Луганск Улус Республиканың Свердловск тус чер округунуң баштыңы Андрей Валерьевич Сухачевка изиг байырымны чедирип тур мен. Донбасстың күш-ажылчы чедиишкиннери бистиң улуг чуртувустуң төөгүзүнүң чырык арнында база бир улуг ужур-утканы илередип турар” – деп, Тываның Баштыңы бодунуң байыр чедириишкининде демдеглээн.

Чуруктарны интернеттен алган.