Республика Баштыңы Владислав Ховалыг Москвага ажыл-агыйжы сургакчылаашкын үезинде РФ-тиң Чазак Даргазының оралакчызы Татьяна Голикова-биле ужурашкаш, Тывада элээн каш социал ужур-дузалыг объектилер тудуунга хамаарыштыр чугааны чоруткан.
Регионнуң удуртукчузу вице-премьерниң кичээнгейин 2026–2028 чылдарда тудар ужурлуг капитал тудуг объектилериниң федералдыг реестринче Кызылда республиканың туберкулезка удур эмнелгезин киирериниң аргазынче угландырган.
«Чурттуң Президентизи-биле бирги ужуражылгамда-ла туберкулез-биле демиселди чугула айтырыг кылдыр көдүрген турган. Бистиң эмчилеривис аарыгны илередирин көвүдедип, оон чок болур чорукту эвээжеткен. Чаа инфраструктурага хереглел улуг. Эрткен неделяда Владимир Владимировичиге объектиниң төлевилел дөзевилелин кылып доосканын, ооң өртек-үнези регионга аар болуп турарын илеткээн мен» — деп, Владислав Ховалыг чугаалаан.
Республикага тускайжыттынган эмнелге албан черин тудары шагда негеттинип келген турбуже, чүгле эрткен чылын ол шимчеп эгелээн – төлевилел-санаашкын документилерин ажылдап кылган. Ынчан Президент Владимир Путинниң айтыышкыны-биле төлевилел белеткелиниң акша-хөреңгизин Россияның Кадык камгалал яамызы үндүрген турган.
Таңды кожууннуң Сой суурга база бир эмнелге чери— тубдиспансерниң салбырын тударының айтырыын ийи тала чугаалашкан. Совет үеде-ле туткан амгы эмнелге салбырының улуг улус талазында 80 орун, уруглар талазында 70 орунну аарыг кижилерде тускайлаан. Ам чаа оран-сава эргежок херек апарган.
Владислав Ховалыг 1250 олуттуг чаа филармонияның төлевилелин Татьяна Голиковага таныштырган. Регионнуң удуртукчузу Россияның культура сайыды Ольга Любимова-биле ужурашканының соонда, төлевилелди ажылдап кылган. Тываның Баштыңы федералдыг төптүң деткиишкини-биле регион тудугну эгелээринге белен деп илеткээн.
Владислав Ховалыг Татьяна Голикова-биле ужурашканының соонда, чаа уруглар садтарының база өскүс болгаш ада-иезиниң хайгааралы чок арткан ажы-төлге чуртталга тудугларын тударын дыңнаткан.
А. МОНГУШ.
«Шын» №69 2024 чылдың сентябрь 11