Владислав Ховалыг «Тиилелге» спортчу-культура төвү декабрь 20-де ажыттынар деп бодунуң телеграм-каналында дыңнаткан. Республиканың Баштыңы спортчу-культура төвүнүң ажыттынарын чарлап тура, Улуг Тиилелгениң 80 чылынга тураскаадып адаан спортчу объект Ада-чурт камгалакчызының чылында ажыттынары ханы уткалыг деп айыткан.
Республиканың Баштыңы спортчу-культура төвүнге чедип, спорт комплекизиниң кайы хире беленин хынаан. «Бо дээрге анаа-ла ындыг чаа объект эвес, а 4500 хире көрүкчүлерни хүлээп алыр Тывада эң улуг болгаш амгы үениң спортчу шөлү-дүр. Ында волейбол, баскетбол, мини-футбол, янзы-бүрү дайынчы спортчу хевирлер, стол теннизи, фитнес талазы-биле профессионал белеткелдерни эрттиреринге бүгү-ле таарымчалыг байдалдарны тургускан. Ол ышкаш кадыкшылы кызыгаарлыг кижилерни спортче хаара тударынче онза кичээнгейни угландырган төп — кижи бүрүзүнге чедингир болур ужурлуг» — деп, республика Баштыңы ооң ажыттынар хүнүн чарлап тура, демдеглээн.
«Тиилелге» спортчу-культура төвү Кызыл хоорай чоогунда, Кызыл кожууннуң хоорайжыткан Каа-Хем суурунда турар. Республиканың чурттакчылары объектиниң ажыдыышкынын он чыл ажыг манааннар. Республиканың Чазааның күжениишкиннери болгаш Россияның Спорт яамызының болгаш федералдыг эрге-чагырга органнарының деткимчези-биле тудугну доозарынга акшаландырыышкын чедип алдынган.
Улуг Тиилелгениң 80 чылынга болгаш Ада-чурт камгалакчызының чылынга тураскаадып, спортчу-культура төвүн «Тиилелге» деп адаар дугайында шиитпирни Владислав Ховалыг республиканың Дээди Хуралының депутаттарынга Айыткалының үезинде чарлаанын сагындыраал.
«Эрткен болгаш амгы үениң маадырларынга хүндүткелдиң тураскаалы-дыр. Чаа спортчу-культура төвүнге келген аалчылар болгаш спортчулар ооң ханаларынга спортчу чедиишкиннерни чедип ап, а комплекс ооң тиилелгелериниң сүлдези апаарынга бүзүрээр мен. Ол ышкаш бүгү-российжи болгаш делегей чергелиг маргылдааларны эрттирер боттуң шөлү апарып, республиканың спортчу инфраструктуразын чаа деңнелче көдүрүп кээр ужурлуг» — деп, Тываның Баштыңы бижээн.
Республиканың яамылар болгаш ведомстволарындан, ол ышкаш Тываның Чазааның Аппарадындан күш-ажылчы коллективтерни спортчу-культура комплекизиниң ишти-даштында тудуг боктарын арыглаарынче база ол чоок-кавы долгандыр девискээрни чаагайжыдарынче хаара туткан.
Спортчу-культура комплекизин долгандыр чаагайжыдар ажылдарга янзы-бүрү организацияларның ажылдакчылары киржип, 380 хире хадылар өзүмнерин олуртурунга үлүүн киирген.
Спортчу-культура комплекизиниң ажыдыышкынында чылдың-на эртер кол спортчу хемчег – «Спортчу элита-2025-тиң» тиилекчилерин шаңнаар байырлал болуп эртерин Тываның Спорт яамызы дыңнаткан. Байырлалче хүндүлүг аалчыларны болгаш ат-сураглыг спортчуларны чалаан.
Спортчу-культура комплекизиниң байырлыг ажыдыышкыны 13.00 шакта эгелээр, ынаар кирери халас
ТР-ниң Чазааның парлалга албаны.