Новосибирск хоорайга Россия Федерациязының Президентизиниң Сибирь федералдыг округта бүрүн эргелиг төлээзиниң чанында Чөвүлел хурал Анатолий Серышевтиң удуртулгазы-биле болуп эрткен. Тываның Баштыңы Владислав Ховалыг Сибирь регионнарының дээди албан-дужаалдыг кижилери-биле кады ужуражылгага киришкен. Хуралдың киржикчилери Сибирь федералдыг округтуң субъектилеринде күрүнениң миграция политиказының айтырыгларын сайгарган.
Демографтыг чидиг байдал болгаш ажылчын холдарның чедишпезинден, экономиктиг хөгжүлдениң айтырыгларын шиитпирлээри-биле бистиң чуртувусче даштыкы ажылчын күштү хаара тудары чугула деп, бүрүн эргелиг төлээ демдеглээн. Россия Федерациязының Президентизи ооң-биле холбаштыр, миграция политиказын чаартыры негеттинип турарын чаңгыс эвес удаа демдеглээнин Анатолий Серышев сагындырган. Бистиң чуртувуска келген даштыкы хамаатылар российжи ниитилелге алдынарының хоойлуларын болгаш дүрүмнерин сагып, бистиң үндезин үнелиг чүүлдеривисти хүндүлеп, российжи хамаатыларның эргелерин хажытпас ужурлуг.
Сибирьниң регионнарынче чылдың-на 650 муң хире даштыкы хамаатылар ажылдаар сорулгалыг кээп турарын дыңнаткан. Сибирьде мигрантыларның 60 хире хуузу – Таджикистан биле Узбекистан республикаларының хамаатылары. Сөөлгү үш чылда 100 муң хире даштыкылар түр када чурттаар база чурттап болур чөпшээрелди алган. Россияның хамаатызы эргени 110 муң ажыг кижи, ооң иштинде 40 муң назы четпээннер алган. Сибирьниң улуг регионнары эң улуг миграция чүъктүг дээрзи демдеглеттинген.
Тыва Республикада миграция агымы эвээш регион, чурттакчы чонунуң санынга онааштыр даштыкы хамаатыларның үлүү сезон аайы-биле 0,3 хуу, азы Россия Федерациязының ортумак көргүзүүнден элээн эвээш. 2024 чылда Тываның миграция учедунда 2598 даштыкы хамааты бүрүткеттинген. 2025 чылдың эгезинден республика девискээринге социал ужур-уткалыг объектилер тудары болгаш чаартыры-биле холбашкан федералдыг, регион болгаш инвестиция төлевилелдерин боттандыржыр дээш республикаже келген даштыкы хамаатыларның саны өскени демдеглеттинген.
2025 чылдың бирги кварталында 1439 даштыкы хамааты, оларның аразында Узбекистан, Кыргызстан, Таджикистан, Моол, Казахстан, Азербайджан, Армения, Белоруссия, Турция, Индия, Италия, КУДР, Көрей Республика, Молдова, Украина база хамааты эргези чок бир кижи миграция учедунда тургустунган.
Хурал үезинде чөвүлел кежигүннери Красноярск крайның, Новосибирск база Омск областарның эрге-чагырга органнарының мигрантыларның социал-культурлуг адаптациязы, оларның экстремисчи болгаш терроржу ажыл-херектерже киржилгезин болдурбас дээн арга-дуржулгазы-биле танышкан.
Миграция адырында ажылды экижидер дээш чаа эрге-хоойлу баазазын ажылдап, чугула айтырыгларны шиитпирлээр немелде арга-хевирлерни тургузуп турарын дыңнаткан. Күрүне баштыңының чарлыы езугаар, Россияның ИХЯ-зының Миграция айтырыгларының талазы-биле кол эргелелиниң баазазынга «Даштыкы хамаатыларның хамааты эргези база бүрүткээр албаны» тургустунар. Күрүнениң миграция политиказының концепциязының чаа хевиринче чаарттынган аргаларны киирерин чедип алыр.
Чөвүлел кежигүннери чугаалажыышкын соонда, ведомстволар аразында кады ажылдажылганың үре-түңнелин бедидер талазы-биле сүмелерни ажылдап кылган.
ТР-ниң Чазааның парлалга албаны.