Тываның Баштыңының Кубогу дээш хол бөмбүүнүң маргылдаазы

Республиканың хол бөмбүүнү командалары бо маргылдаага шагда-ла белеткенип келген. Август 8-тиң хүнүнде маргылдаа херээжен командалар оюнундан эгелээн.

Тываның кожууннарындан болгаш хоорайларындан ниитизи-биле 12 команда маргылдаада киржип турар. Киржикчилерни 4 аңгы бөлүкке чарган. Бир бөлүкте-ле 3 команда кирип турар. Олимпий хевиринге болуп эрткен оюннар соонда, түңнел оюнда арткан командаларны долгандырыг хевиринге ойнадыр сорулганы салган. Ынчангаш 6 түңнел оюн болур.

Доктааткан чурум ёзугаар, бир командада-ла 9 кижилиг 2 бөлүк ойнаар. Оларның алдызы ойнаар, үжү солчур кижилер болур. Дыштанылга үези-даа болза командалар дендии шыырак ойнап чоруп турарлар. Маргылдааның тиилекчилери 300 муң акшаның сертификадын алыр, а ийиги черни 200 муң, үшкүзүн 100 муң, дөрткүзүн 50 муң акша-биле шаңнаар.

“Кызыл кожуундан 4 херээжен чыынды комаанда келген. Шак мындыг маргылдаалар болуп турарынга аажок өөрүп тур мен. Чүге дээрге волейбол республикада спорттуң эң-не нептереңгей хевирлериниң аразында 2 дугаар черни ээлеп турар” – деп, “Сүбедей” спорт школазының тренери Светлана Тодушева чугаалаан.

Херээжен командалар аразынга маргылдаа август 8-тен 11-ге чедир уламчылаар. Август 15-тен 18-ке чедир эр командаларның оюнун хол бөмбүүнүң ойнакчылары болгаш аарыкчылары манап турар.

Чуруктарны “ТуваМедиагрупптан” алган