Август 15-те «Сүбедей» спорт өргээзинге хол бөмбүүнге херээжен болгаш эр улустуң командаларының аразынга Тываның Баштыңының Кубогунуң ажыдыышкыны болган. Ында 15 эр болгаш 12 херээжен команда, шупту 324 спортчу киржип турар.
Хол бөмбүү – бүгү чонда нептерелди алган спорттуң калбак хевири. Тывага ону 1929 чылда тыва сургуулдар үлегерлеп эккелген. Ол-ла дораан ук оюн аныяк араттарны сорунзалап, ынак оюну апарган.
«Хол бөмбүү бистиң республикада нептереңгейиниң талазы-биле ийи дугаар спорттуң хевири. Тываның Баштыңы болгаш Спорт яамызы спорттуң калбак хевирлериниң хөгжүлдезинче улуг кичээнгейни угландырып турарын демдеглексей-дир мен. Хол бөмбүүнге шупту улус ынак, ону школаларда, көдээ суурларда, спорт залдарында ойнап турар. Ойнакчыларга тулган оюнну болгаш солун эш-хуу ужуражылгаларны күзедим” — деп, байырлыг ажыдыышкынның үезинде ТР-ниң Дээди Хуралының (парламентизиниң) Даргазы Каң-оол Даваа чугаалаан.
“Хол бөмбүү кижи бүрүзүнге чедингир. Бирги ээлчегде, ол спортчунуң кадыкшылын быжыглаар” — деп, Тываның Эмчилер палатазының баштаар чериниң даргазы Анджела Канчыыр-оол чугаалап турар.
Херээжен командалар аразынга оюннар август 8-те-ле эгелей берген турган, шупту 12 команда аңаа киришкен.
Бирги черни Кызыл хоорайның Төлээлекчилер хуралының командазы чаалап алган, шаңналы — 300 муң рубль. Ийигизинде — “Чеди-Хаан” командазы, шаңналы — 200 муң рубль. Үшкүзүнде — Онза байдалдар яамызының командазы, шаңналы — 100 муң рубль. Дөрткү черни Ак-Довурак хоорайның командазы алгаш, 50 муң рубльге төлептиг болган.
Эр улус аразынга ужуражылгалар август 18-ке чедир үргүлчүлээр.
"Шын" №62 2024 чылдың август 17