“Сүбедей” спорт ордузунга июль 30-ден август 3-ке чедир 2009 чылда төрүттүнген оолдар, уруглар аразынга Тываның Баштыңының шаңналы дээш баскетбол маргылдаазы көдүрлүүшкүннүг байдалга болуп эрткен. Аңаа шилиттинген уругларның база оолдарның шыырак командалары күжүн шенеп киришкеннер.
Түңнелинде оолдар аразынга “Сүбедей” спорт школазының командазы 1-ги черни ап, тиилекчи болган. Дараазында 2-3 дугаар черлерни Кызылдың 17 дугаар школазы база Барыын-Хемчик кожууннуң командалары үлешкеннер. Уруглар аразынга “Ярыгин” спорт школазының командазы 1-ги черни ап, тиилекчи болган. Дараазында 2–3 дугаар шаңналдыг черлерни Республиканың күрүне лицейиниң база Кызылдың № 17 школаның командалары алганнар.
Бирги база 2-3 дугаар чер алган командаларга кубок, медаль, диплом, 50-30-20 муң рубль акшаларның сертификаттарын шаңналга тывыскан.
Уруглар аразынга шыырак халдакчының шаңналын “Ярыгин” командазындан Рада Хомушку, шыырак дамчыдыкчының – күрүне лицейиниң ойнакчызы Аселя Ондар, шыырак камгалакчының шаңналын № 17 школадан Александра Монгуш алганнар. Оолдар аразынга шыырак халдакчы – “Сүбедейниң” ойнакчызы Эрлан Доңгак, шыырак дамчыдыкчы – Барыын-Хемчик командазындан Ян Ооржак, шыырак камгалакчы № 17 школаның ойнакчызы Михаил Лаптев олар тускай белектерни алганнар.
Элээди база аныяк оолдар, уруглар аразынга баскетболдуң сайзыралынга Тываның Баштыңының шаңналы дээш баскетбол маргылдаазы улуг деткимче болуп турары өөрүнчүг.
А. Чамбал-оол, спорттуң хоочуну.
Авторнуң тырттырган чуруу.
“Шын” № 30 2025 чылдың август 7