Тываның Баштыңы Владислав Ховалыг Дмитрий Чернышенко-биле ужурашкан. Ужуражылга үезинде регионнуң эртем, өөредилге, аныяктар политиказы, туризм болгаш спорт адырларының сайзыралын сайгарып чугаалашкан.
«Бистиң Президентивис Владимир Путин Тывада сайзыраар аргалар дыка хөй, чүгле ону чедимчелиг кылдыр ажыглаар болза эки деп демдеглеп турар. Эң кол черни өөредилге болгаш специалистер белеткели ээлеп турар. Школа, уруглар садтарында 11 муң ажыг чаа олуттар тургустунган, 48 школага капитал септелгени чоруткан. Өөредилге адырында тудуглар ам-даа немей кылдынып турар. Силерниң студентилериңер чугула херек инженер-техниктиг болгаш башкы мергежилдерге өөренип турар» – деп, оралакчы дарга чугаалаан.
Профессионалитет деп федералдыг төлевилел-биле Тывада тудуг, даг-тывыш болгаш көдээ ажыл-агый угланыышкыннарынга 3 кластерни тургускан.
«Аныяктарга регион» деп мөөрейге тиилелгелерниң ачызында Тыва аныяктар девискээрлерин чаартып, септээринге 100 хире сая рубльди шиңгээдип алган.
«Добро.РФ» платформазында Тывадан 23 муң ажыг эки турачы бүрүткеттинген.
Оон аңгыда Тыва «Туризм болгаш аалчылар уткууру» деп национал төлевилелде киржип турар. Республикаже кээп турар туристер саны болгаш аалчылар бажыңнары немежип турар. 2025–2027 чылдарда чаңгыс аай субсидиялар акшаландырыышкыны-биле республикага модульдуг аалчылар бажыңнарын тударынга 90 сая рубльди аңгылап берген.
Чазак Даргазының оралакчызы регионнарның спортка көргүзүглерин тускай рейтинг системазы-биле үнелээрин дыңнаткан. Тыва эки түңнелдерни көргүзүп турар. Республикада 2024 чылдың төнчүзүнге чедир спортка доктаамал киржилгениң деңнели 58 хуу, а спортчу оран-сава-биле хандырылга барык 82 хуу чедип турар.
Регионга спортчу инфраструктураны тургузарынга акша-хөреңгини күш-культура болгаш спортту хөгжүдер комплекстиг күрүне программазы ёзугаар киирип турар.
«Амгы үениң инфраструктуразын тургузуп, өөредилге болгаш спортчу төлевилелдерни сайзырадып, салым-чаяанныг аныяктарны деткиир дээш, идепкейлиг ажылдап турар бис. Амгы үениң хөгжүлде угланыышкыннарынга дүүштүр чонувустуң онзагай культурлуг өнчүзүн кадагалап арттырарынче онза кичээнгейни салып турар бис» – деп, Тываның Баштыңы Владислав Ховалыг онзалап демдеглээн.
Медээни болгаш чурукту ТР-ниң Чазааның социал четкиде арнындан алган.