Сентябрь 8-те төлээлекчи органнар составы чаарттынган Тываның чамдык муниципалитеттеринде кожууннарның чаа баштыңнары – Төлээлекчилер хуралдарының даргаларын бо хүннерде бадылап турар.
Кызыл кожууннуң баштыңынга күш-ажылдың хоочуну, «Чаңгыс демниг Россия» партияның кежигүнү Елена Филиппованы бадылаан. Ол уруглар садының кижизидикчи башкызы болуп күш-ажылчы оруун эгелээн. Көк-Тей эге школазының, Каа-Хемниң 2 дугаар школазының эге класстар башкызы, директорнуң оралакчызынга ажылдаан. Каа-Хем школазын беш чыл удурткан. 2023 чылдың мартта Кызыл кожууннуң Төлээлекчилер хуралының даргазында соңгуткан.
«Чаңгыс демниг Россия» партияның кежигүнү Анай-Хаак Лопсан-Серен Өвүр кожууннуң Төлээлекчилер хуралының даргазынга база катап соңгуткан. 2016 чылдан бээр Өвүр кожуун Хуралының даргазының оралакчызы, а 2020 чылдан хуралды баштаан. Биология болгаш күш-культура башкызы эртемниг, валеолог башкы, Хандагайты школазын директорлап ажылдап чораан.
Каа-Хем кожууннуң Төлээлекчилер хуралының баштыңынга «Чаңгыс демниг Россия» партияның кежигүнү Евгений Ооржак база катап соңгуткан. Ол дыка хөй чылдарда республиканың корум-чурум камгалаар органнарынга ажылдаан. 2017 чылдан муниципалдыг албанга ажылдап эгелээш, Суг-Бажы суурнуң суму даргазынга, Каа-Хем кожууннуң чагырга даргазынга чедир депшээн.
Тожу кожууннуң Төлээлекчилер хуралының депутаттары Аяс Кашкакты баштың кылдыр соңгаан. Ол корум-чурум камгалаар органнарга 25 чыл ажылдаан. Халажылгаже үнгеш, Тожу кожууннуң чагырга даргазының корум-чурум профилактиказының талазы-биле оралакчызынга томуйлаткан. Депутат кылдыр соңгудар мурнунда Тываның даг-техниктиг техникумунуң директору турган.
Херел Серен-Чимит Чаа-Хөл кожууннуң депутаттар корпузун баштап эгелээн. Кожууннуң Культура бажыңының чолаачызындан күш-ажылы эгелээн. “Тывахарылзааинформга” электромонтёрлап, чоокка чедир Чаа-Хөл кожууннуң ЕДДС-ке оперативтиг дежурный болуп ажылдаан. Кожууннуң Адалар чөвүлелиниң кежигүнү.
Шупту томуйлаткан удуртукчулар – тус черниң чурттакчылары. Бо чоокку хүннерде Тес-Хем, Бай-Тайга база Барыын-Хемчик кожууннарның Төлээлекчилер хуралдарының даргаларын соңгуур.
Бистиң корр.
“Шын” №75 2024 чылдың октябрь 2