Тыва дээрге делегейде бир-ле онзагай чурт. Тывада бойдус чаяалгалыг дириг амытаннар хевирлиг азы чуруп каан ышкаш черлер хөй. Чижээ, Тес-Хем кожуунда Теве-Хаяны көөрге, ылап теве ышкаш. Шак ындыг хая Чөөн-Хемчик кожуунга база турган, ону арай үреп каапканы хомуданчыг. Эрзинде эзирниң бажынга дөмей хая бар. Таңды кожуунда Балгазын оруундан, чок болза Чагытай хөлден аргалыг тайгаже таптыг көөр болза, галстуктуг пионер чуруттунган. Саян кырында бир дагны көөрге, чыдар херээжен кижи дүрзүзү ышкаш көстүр.
Бо чурукта чаңгыскурсчуларым Тожу кожууннуң Кызыл-Хаяже бар чыткаш, тырттыржып алган. Артында Тываның 1921 чылга чедир картазынга дөмейлешкек Тожу кожуунда Ногаан-Хөл-дүр. Хубсугул Тывага артып калган турган болза, тыва чон Тожулап аргыжар турган боор. Аргыжар орукту черле кылып каар турган чадавас, чок болза самолет-биле ужуп аргыжар чадавас боор.
Тывавыстың чараш булуңнарын кадагалап чоруулуңар!
Сергей ОЮН.
Чурукту авторнуң архивинден алган.
"Шын" №57 2024 чылдың июль 31