Тываның Баштыңы Владислав Ховалыгның адынга «Тываның буянныг чүректери» аныяктарның хөй-ниити шимчээшкининден Тыва Республиканың Күрүне тугунга тураскааткан албан езунуң байырлал хүнүн тургузар дугайында санал кирген.
ТР-ниң Баштыңының чанында күрүне демдектериниң айтырыгларының талазы-биле күрүне комиссиязының эксперттери база хөй-ниитиниң киржилгези-биле сайыттар кабинединге айтырыгны сайгарган соонда, республиканың Күрүне тугунуң хүнүн сентябрь 17-де доктаадыр дугайында хоойлу төлевилелин Дээди Хуралче киирер шиитпирни хүлээп алган.
«Бир эвес парламентарийлер "ийе" деп бадылаптар болза, бистиң календарывыска база бир ажылдаар байырлал хүнү бар апаар» – деп, Владислав Ховалыг шиитпирни соцчеткилерде тайылбырлаан.
ТР-ниң Чазааның хуралында, Тываның сайыттар кабинединиң кежигүннери хоойлу төлевилелин чаңгыс үн-биле бадылаан. Тыва Республиканың күрүне демдектерин суртаалдап, өөреникчилерниң төөгүде билиглерин быжыглап, өзүп олурар салгалга ада-чуртчу болгаш хамааты кижизидилгени, төрээн чуртунга чоргааралды болгаш ынакшылды хевирлээр дээн авторларның эгелээшкинин Владислав Ховалыг, ооң оралакчылары база сайыттар деткээн.
«Тыва Республиканың байырлал хүннериниң дугайында» Тыва Республиканың Хоойлузунуң 1-ги чүүлүнче өскертилгелер киирериниң дугайында» Тыва Республиканың хоойлу төлевилелин Дээди Хуралга сайгарып көөр кылдыр дамчыткан.
#Тывачазак #Дээдихурал #ТМГМедээлер #Тыва #Тывамедээ #Тывадыл #Тывамедиагрупп #Тува