Москвада Президент академиязында (РАНХиГС) күрүне эргелеп-башкарылгазының бирги делегей чергелиг конгрези ажыттынган. Регионнуң удуртукчузу Владислав Ховалыг баштаан Тыва Республиканың Чазааның кежигүннери эң эки арга-дуржулгаларны хевирлээр, хөгжүлдениң кол угланыышкыннарын тодарадыр, күрүне эргелеп-башкарылгазының шынарын бедидер практиктиг айтырыгларны шиитпирлээр төп апаар хемчегде киржип турар.
Конгресстиң шөлдеринде Россия Федерациязының Президент Администрациязындан болгаш Чазаандан кол адырларның удуртукчулары, регионнар болгаш муниципалдыг тургузуглар баштыңнары, парламент кежигүннери, күрүне корпорациялары болгаш бизнес адырында ада-чурттуң улуг компанияларының топ-менеджерлери, удуртулга адырында делегей чергелиг эксперттер, хөй-ниити ажылдакчылары, эртем болгаш эксперт ниитилелдерниң төлээлери, ол ышкаш аныяк лидерлер чыылган.
Россия Федерациязының Чазааның болгаш Россияның Президент Администрациязының деткимчези-биле Президентиниң академиязы ол хемчегни организастап турар. Роконгресс фондузу бо хемчегниң партнёру.
«Тываның конгресске киржилгези – үе-шакты деңнеп, чурагайжыдылганың болгаш удуртуп-башкарылганың эң эки арга-дуржулгазын шиңгээдип алырынга дыка эки арга-дыр. Ол дээрге элээн каш угланыышкыннарда: чурагайжыдылга, бизнеске шаптараазыннарны эвээжедири, мергежилдиг кадрлар, федералдыг чазак-биле дорт чугаага практиктиг ажыл-дыр. Чоокку чылдарда олар республика хөгжүлдезиниң шимчедикчилери апаар» - деп, Владислав Ховалыг ук хемчегни тайылбырлаан.
Практиктиг угланыышкын конгресстиң онзагайы болган: программаның 30 хире хуузу интерактивтиг өөредилге арга-хевирлерден, ооң иштинде удуртулга шиитпирлерин хүлээп алырының дугайында ажыл-агыйжы оюннар, стратегтиг сессиялар болгаш удуртулга практикаларында боттуг чижектерден тургустунган. Тускай темалыг курс-биле аныяктарже аңгы кичээнгейни угландырган.
Февраль 10-дан 13-ке чедир уламчылаар хемчег удуртукчуларга, бизнеске болгаш эксперттерге чыл санында профессионал чугаа чорудар, арга-дуржулга солчур, өөредилге эрттирер шөл апаар.
ТР-ниң Чазааның парлалга албаны.