Июль 24–27 хүннеринде Алтай Республиканың Кош-Агач районунга I делегей чергелиг “Куйактаңар” деп аттыг дарганнарның этнофестивалы болган. Фестивальды Саха (Якутия) болгаш Алтай республикаларның дарганнар каттыжылгазы организастаан. Бо онзагай болуушкун Россияның аңгы-аңгы булуңнарындан эң-не тергиин дарганнарны каттыштырган — Алтайдан, Саха (Якутия), Тыва, Урал, Бурятиядан, ол ышкаш Төп Азия чурттарындан: Моол болгаш Казахстандан. Бистиң республиканы Тываның эң-не тергиин дарганнарының болгаш мастерлериниң шыырак командазы төлээлээн: Орлан Сат, Кенин Сат, Бадый Ондар, Александр Сат болгаш Аңчы Монгуш.
“Куйактаңар” — көшкүн чоннуң дарганнаар бурун ус ажылын катап сайзырадыр сорулгалыг фестиваль. Этнофестиваль үезинде байырлыг байдалга аалчыларга каңны эзилдирерин база дарган ажылының бурун технологияларын таныштырып көргүскен. Ол ышкаш мастерлер эң ховар бижектер болгаш холдан кылган ажылдарның делгелге-ярмарказынга база киришкеннер.
Фестивальдың мөөрей кезээнден аңгыда, аалчыларга национал оюннарны база чогаадыкчы коллективтерниң күүселделерин бараалгаткан.
Тываның “Ураанхай” командазы делегей чергелиг I “Куйактаңар” деп дарганнар этнофестивалының тиилекчизи болган.
Бистиң корр.
Чуруктарны интернеттен хоолгалаан.
“Шын” №29 2025 чылдың июль 31