Тываның күрүнениң ойнаар-кыстар театры 10 чыл оюн демдеглээн

Март 21-де Бүгү-делегейниң кукольниктер хүнүнге болгаш Тываның күрүнениң ойнаар-кыстар театрының 10 чылдаан юбилейинге тураскааткан байырлыг хемчеглер болуп эрткен.

Ийи дакпыр байырланчыг хүн “Азияның төвү” туризм төвүнге театрның кол киржикчиери- ойнаар-кыстарның “Хуулгаазынныг делегей” деп делгелгезинден эгелээн. Ооң байырлыг ажыдыышкынынга юбилейлеп турар театрның артистерин доостурган башкылары Санкт-Петербург, Москва, Ярославльдан чаладып кээп киришкен.

Чыылганнарга ТР-ниң Культура яамызының оралакчы сайыды Илья Синкин байыр чедиргеш, чаа-ла 10 харап турар театрга хамаарылгалыг бүгү артистерге, чурукчуларга, кайгамчык чараш ойнаар-кыстарны кылып турар бутафоржуларга ийи дакпыр байырлалы- биле изиг байырын чедирген.

Үстүнде айыткан театрның юбилейлиг хемчеглерин делгелгеден эгелеп турары чөптүг. Чүге дээрге кол актёрлар - ойнаар –кыстар болгай. Оларны “диргизип”, сценаже үндүрүп, солун шиилерни ойнап турар артистерниң чалап алган башкылары делгелгени дыка сонуургааннар. Ол дугайында делгелге соонда болган парлалга конференциязынга чугаалап турганнар.

Ол-ла хүннүң кежээзинде байырлыг хемчег юбилейлээн театрга уламчылаан. Аңаа ТР-ниң Чазак Даргазының оралакчызы Елена Хардикова байыр чедиргеш, аныяк театрга, ооң демниг коллективинге моон-даа соңгаар чогаадыкчы чедиишкиннерни күзээш, Тыва Республиканың күрүне шаңналдарын тывыскан. Ол хүн үстүнде адаанывыс театрның директору Саян Монгушка "Тыва Республиканың уран чүүлүнүң алдарлыг ажылдакчызы", а аныяк артизи Аржаана Дамдынга "Тыва Республиканың алдарлыг артизи" хүндүлүг аттарны тывыскан. Ол ышкаш Тыва Чазактың, Тываның Культура яамызының болгаш өске-даа шаңналдарны театрның коллективинден өске-даа ажылдакчылары алган.

Допчузу-биле “Шын” солуннуң дараазында үндүрүлгезинде

Делгелге март 31-ге чедир уламчылаар.