2019 чылда РФ-тиң Президентизи Владимир Путинниң эгелээшкини-биле Россияга «Айыыл чок оруктар» национал төлевилел эгезин салган. Ынчан ук төлевилелди беш чылга планнаан турган. Ынчалза-даа 2022 чылда төлевилелдиң хуусаазын 2030 чылга чедир узаткан.
«Айыыл чок болгаш шынарлыг оруктар – бүдүрүлгеге, көдээ ажыл-агыйга болгаш тудуг адырынга регионнар аразында, ынаар РФ-тиң чаа субъектилери база кирип турар, аргыжылгазынга улуг ужур-дузалыг» – деп, В. Путин чугаалаан.
Ол ышкаш «Айыыл чок оруктар» национал төлевилел Тываның девискээринге идепкейлии-биле боттанып эгелээн. Чижээлээрге, Барыын-Хемчик кожууннуң чагырга даргазының амыдырал-хандырылга талазы-биле оралакчызы Адыгжы Биче-оолдуң медеглээни-биле алырга, национал төлевилелдиң ачызында Кызыл-Мажалык биле Аяңгаты аразында Аяңгаты хемни кежир көвүрүгнү туткан.
«Восток» КХН ажылды хүлээнгеш, эчизинге чедир туткан. Тудуг ажылы ийи чадалыг болган. Баштайында – 88 сая, а ийи дугаарында, 70 сая рубльди керээ езугаар күрүне үндүрген.
Ооң мурнунда Аяңгаты чонунуң кожуун төвү-биле аргыжылгазы берге байдалга турган. Орукка хөй үени чарыгдаар турган болза, амгы үеде тус черниң чурттакчы чонунга эптиг болгаш айыыл чок байдалдар тургустунган деп болур.
Бистиң корр.
Чурукту интернет четкизинден алган.
«Шын» №5 2024 чылдың январь 24