Бюджет камгалалында – 30 чыл
Казначейство – күрүнениӊ саӊ-хөөзүн харыылаар кол органнарныӊ бирээзи. Бо чылын Тыва Республикада Федералдыг казначействонуӊ эргелели 30 чыл оюн демдеглээри-биле холбаштыр, ук албан чериниӊ удуртукчузу Солаӊгы Саая интервью берген.
– Солаӊгы Николаевна, төөгүлүг үе-шагныӊ хемчээли-биле алырга, 30 чыл хөй эвес болуп турар. Ындыг-даа болза ол үе иштинде казначействонуӊ ажыл-амыдыралынга кандыг онза болуушкуннар болган ирги?
– Эргелелдиӊ подразделениелерин тургускан соонда, кол ажыл болза, республиканыӊ девискээринге федералдыг бюджет күүселдезин, тодаргайлаарга, бюджеттиӊ орулгазын, чарыгдалын санаар, саӊ-хөөнү таарыштырар ажылды организастаары турган. Ниитизи-биле алырга, казначейство бодунуӊ ажыл-чорудулгазын чурттуӊ кадыг-берге үелеринде тургузуп эгелээн.
1995–1996 чылдарда өре-шире көвүдеп турган. Ону дуглаар дээш, федералдыг бюджеттиӊ, организацияларныӊ, санаашкын кылыр албан черлериниӊ аразынга янзы-бүрү схемаларны тургузуп турган. Өре дуглаарынга, казначействонуӊ үнелиг саазыннарын, үндүрүг төлээринден хостаар бижиктерин, акшаландырыышкынны сорулгазынга дүүштүр санаар методту ажыглап турган.
Ол үелерде бюджет албан чериниӊ агар саны коммерциялыг банкыларга турган. Олар бюджеттен тускай сорулгалыг чоруткан хөреӊгини шилчитпейн, доктаамал саададып турган.
Федералдыг бюджет хандырылгалыг албан черлериниӊ акшаландырыышкынын чарыгдаар талазы-биле операцияларны учеттаар дээш, 1995 чылдыӊ майда ТР-ниӊ Национал банкызынга бир дугаар бюджеттиӊ агар санын ажыткан. Казначейство органнарыныӊ агар санынга бюджет хөреӊгизин херек кырында чыып, ону кадагалыг шыгжап, акша-хөреӊгини сорулгазынга дүүштүр ажыглаарын контрольдаар перспектива бар дээрзи ол үеде-ле билдинип келген.
Организация бүрүзүнүӊ федералдыг бюджеттен келген акша-хөреӊгизин оларныӊ агар санынче шилчидип бээр ажылды Эргелел чада аайы-биле кылган. Чүге дизе кезек бергедээшкиннер тыптып келген: бюджет хоойлужудулгазында эде көөр чүүлдер бар, а бюджет организациялары база ындыг чүүлге белен эвес болган.
2000 чылда республиканыӊ бюджет башкарылгазын касса таварыштыр ажылдаар кылдыр шилчиткен, а 2001 чылдан тура муниципалдыг тургузугларны чоорту ынчаар ажылдаар кылдыр кылган.
2012–2018 чылдарда ТР-ниӊ Саӊ-хөө яамызы, кожууннарныӊ саӊ-хөө органнары-биле кады ажылдааш, бюджет хөреӊгизин шилчидериниӊ чаа аргаларын боттандырган. Казначействонуӊ чаа технологияларын ажыглап, бюджеттерниӊ чаӊгыс аай агар санынче акша-хөреӊги дораан шилчий бээр кылдыр тургускан.
Бюджеттиӊ орулгазын, чарыгдалын санаар саӊ-хөө органыныӊ ажыл-хүлээлгезин ынчан күүседип эгелээн бис.
2015 чылдан тура бюджеттиӊ болгаш автономнуг албан черлериниӊ хостуг хөреӊгизин түр када ажыглап, ол ышкаш казначей чээлизин берип тургаш, республика бюджедин немей акшаландырып турар.
Тыва Республиканың бюджединге 9 чыл дургузунда казначейство 24 млрд 148 сая рубль түӊнүг кредидин берген. Коммерциялыг кредиттерниӊ хуузу улуг болур. А казначей кредидиниӊ чылда ставказы 0,1 хуу. Ооӊ ачызында 2023 чылда республика бюджеди 200 ажыг сая рубльди камнап алган.
Хөгжүлдениӊ чаа чадазы Эргелелге кезек чаа ажыл-хүлээлгелерни кииргени-биле холбашкан.
Казначейство 2015 чылдан тура хөреӊгини контрольдаар ажылды чорудуп эгелээн. ТР-ниӊ чуртталга фондузунуӊ аварийлиг бажыӊнарындан хамаатыларны өскээр көжүрериниӊ регионалдыг программазын боттандырып турда, шак ол контроль ажылы чедимчелиг түӊнелдерни көргүскен.
Казначейство делгемчиткен хыналданы (РКС) чорудуп эгелээрге, чагыглар киирер албан черлериниӊ база чагыгны кылырын хүлээнип алган организацияларныӊ саӊ-хөө талазы-биле чуруму бедик апарган. Чүге дизе акша-хөреӊгини сорулгазынга дүүштүр ажыглаарын хандырып, кайыын, чүнү садып ап турарын көрүп, шуптузун дистиништир хынап турар.
2016 чылда биске саӊ-хөө-бюджет адырынга контроль чорудар бүрүн эргелиг ажыл-хүлээлгени дамчыдып берген.
2019 чылда Федералдыг күүсекчи эрге-чагырганыӊ беш девискээр органнарыныӊ: Күш-ажыл инспекциязы, Россияныӊ Кадык камгалалынга хайгаарал чорудар девискээр органы, Росреестр эргелели, Тываныӊ монополияга удур демисежир албаныныӊ эргелелиниӊ – бюджет учедун чорудар база отчедун тургузар, күш-ажыл төлевириниӊ болгаш өске-даа төлевирлерни шилчидер талазы-биле төпчүткен ажыл-хүлээлгени күүседип эгелээн бис.
Шак ол төпчүткен бүрүн эргелиг ажыл-хүлээлгелерниӊ ачызында, учеттуӊ ылап шын, саӊ-хөө ажыл-агыйын канчаар чорудуп турары көскү билдингир болурун, активтерниӊ болгаш хүлээлгелиг ажылдыӊ байдалыныӊ дугайында медээни дарый кылырын хандырып турар.
Россияныӊ Казначействозунуӊ сөөлгү чылдарда кылган кол чаартылгазы дээрге казначей төлевириниӊ системазын (СКП) ажыглалга кииргени-дир. Ол системада РФ-тиӊ бүгү бюджет системазыныӊ хөреӊгизин чыып каан.
Казначей төлевириниӊ системазынче шилчи бээрге, төлевирлерни шилчидери дүрген апаарындан аӊгыда, бюджет биле бюджеттен дашкаар хөреӊгини саарар, акшаландырар байдалды башкарар чаа аргалар тыптып келген, регионалдыг бюджеттер ооӊ ажыктыын бүрүн хемчээли-биле көрген.
Чаӊгыс аай казначей счедунга артып калган хөреӊги башкарылгазындан республика бо сөөлгү үш чыл дургузунда ниити 1 млрд 96 сая рубль орулгалыг болган.
– Информастыг технологиялар сайзырадыр планны күүсеткен лидерлерниӊ бирээзи казначейство болган. Кандыг кол программаларны ажыглалга кииргениӊерни чугаалап көрүӊерем.
– Федералдыг казначейство органнарыныӊ сайзыралы шупту ажылдарны автоматчыдары, янзы-бүрү программаларныӊ продуктуларын үргүлчү ажыглаары-биле холбашкан.
«Казначей системазын чаартыры» деп төлевилел 2011–2013 чылдарныӊ эӊ-не улуг масштабтыг IT шиитпирлерниӊ бирээзи деп болур.
Федералдыг казначействонуӊ автоматчыткан системазын, ырак черден саӊ-хөө документизин чорудар системаны ынчан ажыглап эгелээн. Клиентилер эӊ баштай онлайн чурумун эптии-биле ажыглап, төлевирлерни болгаш саӊ-хөө документилерин айыыл чокка башкарып эгелээни ол.
2011 чылдан тура күрүне масштабтыг информация системаларын республиканыӊ девискээринге ажыглап эгелээринге, ону сайзырадырынга идепкейлиг киржип турдувус. ГИС – садып алыышкын адырында чаӊгыс аай информация системазы, ГИС – күрүне болгаш муцинипалдыг төлевирлер, ГАС «Управление», Бюджет системазыныӊ чаӊгыс аай порталы – дээн чижектиг чүүлдерниӊ оператору Федералдыг казначейство-дур.
Электроннуг керээлер чарар, садыглажыышкын түӊнелдери-биле ГИС Торги деп системаже шилчидилгелер чорудар ажылды бедик деӊнелге идепкейлиг күүседип келгенивис-биле Россия Федерациязыныӊ субъектилериниӊ аразындан ийиги черде чоруп турарывысты база демдеглээр апаар.
Амгы үеде Росреестрже электроннуг билдириишкин чорудар ажылды шенеп эгеледивис.
Казначейство бо сөөлгү чылдарда Күрүнениӊ «Электроннуг бюджет» деп каттыштырган информастыг системазыныӊ шупту иштики системаларын үлетпүр адырынга практика кырында ажыглап кирипкен. Ол чокта, казначей төлевир системазыныӊ төлевилелдерин, төпчүткен бухгалтерия учедун чорудары шуут болдунмас.
«Электроннуг бюджет» (ГИИС) казначейство органнарыныӊ шупту кылып турар ажылын интернет технологиялар ачызында чыып шыгжаар системаже шилчидери-дир.
– Саӊ-хөө-бюджет адырынга контроль чорудар бүрүн эргелиг ажыл-хүлээлгени казначействога 2016 чылда дамчыдып берген болду. Оон бээр кандыг өскерлиишкиннер болган ирги?
– Эгезинде хамыкты мурнай шиитпирлээр ужурлуг ажылывысты кылган бис. Ол дээрге күрүнениӊ иштики саӊ-хөөзүнге контрольду үзүк-соксаал чок чорударын хандырары-дыр. Чаа ажыл-хүлээлгелерни шиӊгээдиринден аӊгыда, контрольдаар ажылды боттандырар чаа аргаларны база ажылдап кылыр деп сорулга салган. Контроль хемчеглериниӊ материалдарын чөптүү-биле деӊзигүүрлеп көрүп тургаш, сайгарар сорулгалыг Эргелелдиӊ комиссиязын тургускан. Контроль хемчеглерин планнаарда, угланыышкынныг аргалар ажыглаар кылдыр киирген.
2020 чылдан тура РФ-тиӊ Бюджет кодекизинге дүүштүр чурт иштинге күрүнениӊ иштики саӊ-хөөзүн контрольдаар шупту органнарныӊ ажыл-чорудулгазыныӊ талазы-биле доктааткан чурумну хандырар чеди федералдыг стандарттарны ажыглап турар.
Сайзыралдыӊ чаа чадазы – күрүнениӊ саӊ-хөө контролюн чурагайлыг хевирге чорудары. Ол дээрге Федералдыг казначействонуӊ контроль ажылын өскертип, ону чурагайлыг технологияларже шилчидери болур.
Амгы үеде бистиӊ контрольдуг ажыл-чорудулгавыстыӊ планындан эгелээш, отчёдунга чедир шупту процесстерин ГИИС «Электроннуг бюджет» деп чаӊгыс аай чурагайлыг платформаже киирген.
Контрольдуӊ чаа методтары болза, хажыдыышкыннар болдурбас дээш, профилактиктиг хемчеглер чорудуп, күрүнениӊ акша-хөреӊгизин чедимчелиг ажыглаарын бедидеринге дузалыг.
– Казначейлер хүн бүрүде чымыштыг ажыл-ишти кылып турар. Ооӊ кадында коллектив республиканыӊ хөй-ниити болгаш спортчу амыдыралыныӊ идепкейлиг киржикчилери апарган. Ооӊ чажыды чүде ирги?
– Ажылдакчыларныӊ патриотчу кижизидилгезин, мөзү-шынарлыг, чогаадыкчы чоруун, угаан-медерелин болгаш күш-шыдалын сайзырадып, эптиг-демниг чорукту быжыглаар талазы-биле элээн кичээнгей салып турар бис.
Эргелелде Аныяктар чөвүлелин тургускан, олар чедиишкинниг ажылдап турар, ажылдакчыларыныӊ ортумак назыны – 35 хар. Хоочуннар чөвүлели биле баштайгы профэвилел организациязы база идепкейлиг ажылдап турар. «Казначейлер хору» деп эр ыраажылар бөлүүн 2012 чылда-ла тургускан. Оон 2014 чылда «Эне-Сай» деп херээжен улустуӊ танцы студиязын, а 2023 чылда «Санчы» деп фольклор ансамблин тургускан.
Эргелелдиӊ коллективи идепкейлиг хамааты туружун илередип, «Бүгү чүвени тиилелге дээш» деп Улусчу фронтунуӊ акциязынга киржип турар. Акцияныӊ эгезинден тура тускай шериг операциязыныӊ киржикчилеринге гуманитарлыг дузаламчы кылдыр 12 посылканы чорудуп, QR-код-биле акша-хөреӊгини шилчидип турган.
Техника аймаандан: 6 даг мотоциклин (250 куб сантиметр, коробка передачазы 5 кезектиг), 3 квадрокоптер, дизель-генераторлуг станция, дүне көөр 9 туран, от өжүрер 10 херексел, кайы хире ыракта турарын тодарадыр 10 херексел, автомобиль болгаш портативтиг ажыглалдыӊ 7 радиостанциязы, чылыг энергия көөр монокуляр, ок-чемзектиӊ компенсатор деп 6 тускай херексели, кронштейнниг 2 прицел, рациялар, шериг дерилгезиниӊ аӊгы-аӊгы чүүлдери: 22 камуфляж костюм, быжыг идиктер, рюкзактар, майгыннар, удуур дөжектер, фонарьлар дээш оон-даа өске.
Эргелелдиӊ коллективи 28 комплект, ылавылаарга, 221 дөрбелчин метр хемчээлдиг чаштыр четкини, 100 штук деӊни боттары кылгаш, ТШО-нуӊ мурнуку одуруунче чоруткан.
Эргелелдиӊ «Казначей волонтер» деп отряды шериглерниӊ өг-бүлезинге, коллективте кежигүннериниӊ ТШО чоруй барган чоок төрелиниӊ өг-бүлезинге дузалажып турар. Оларныӊ аразында дайынчы хүлээлгезин күүседип тургаш, маадырлыы-биле мөчээн шериглер база бар.
– Казначейлерге 30 чылдаан юбилейи-биле холбаштыр чүнү күзээр силер?
– Амгы үеде Эргелел дээрге күрүнениӊ дагзып каан ажыл-хүлээлгезин күүседир бедик харыысалгалыг профессионалдарныӊ быжыг демниг командазы-дыр!
Тыва Республикада Федералдыг казначействонуӊ эргелелиниӊ тургустунган хүнүнден бээр 30 чыл оюн таварыштыр хоочуннарга база коллегаларымга байыр чедирип тур мен! Ак сеткилдиг күш-ажылы болгаш бедик профессионализми дээш өөрүп четтиргенимни илередип тур мен. Шуптуӊарга быжыг кадыкшылдыг, ачы-буянныг болгаш моон-даа соӊгаар чедиишкиннерлиг болуруӊарны күзедим!
Р. Демчик очулдурган.
Чуруктарны интернет четкизинден хоолгалаан.
“Шын” №92 2024 чылдың ноябрь 30