Тускай шериг операциязының хоочуннарын деткиир болгаш өөредир программа республикада чедиишкинниг боттанып турар. Бо программа ёзугаар 30 хоочун “Күрүне болгаш муниципалитет удуртулгазы” деп программа-биле Тываның күрүне университединиң баазазында боттарының эртем-билиин бедидип турар. Дөрт модульдуг бо программаны Президент академиязының Күрүне удуртулгазының дээди школазының эксперттери-биле ажылдап кылган. Бо программа ёзугаар билиглер бедидер өөредилгениң киржикчилери Россияда бюджет болгаш үндүрүг системалары, күрүне болгаш муниципалитет удуртулгазы дээш өске-даа билиглерни шиңгээдип алырлар.
Өөредилге курузунуң киржикчилери программаның экономика болгаш саң-хөө билиглериниң дугайында ийиги модулюн чедиишкинниг шиңгээдип алганнар. Модульдар аразының харылзааларының дугайында билиглерни бот-өөредилге-биле шиңгээдип алырынче тускай шериг операциязының хоочуннары шилчиир. Олар профессионал мергежил талазы-биле хууда диагностиканы болгаш электроннуг курстарны эрткен соонда, дагдыныкчыларның дузазы-биле эрге-чагырга органнарынга стажировканы эртерлер.
“Күрүне болгаш муниципалитет удуртулгазы” деп программаның киржикчилери Тыва-биле кожа регионнарга чедип, ол черлерде чурттакчы чоннуң культуразы болгаш чаңчылдары-биле таныжып алыры өөредилгениң планында көрдүнген.
Ада-чурттуң камгалакчыларының болгаш Ада-чурттуң Улуг дайынынга Тиилелгениң 80 чылында Россияның Президентизи Владимир Путинниң саналдааны “Маадырларның үези” деп программага дүүштүр “Тываның маадырлары” программаны Тываның Баштыңы Владислав Ховалыгның эгелээшкини-биле республикада боттандырып турар. Бо программага киржир күзелдиг болгаш чагыгларны киирген тускай шериг операциязының 600 дайынчыларының аразындан 30 кижини шилип алган. Олар шупту тестилерни чедиишкинниг эрткен, республиканың хөгжүлдезинге хамаарыштыр эсселерни бижип, төлевилелдиң эксперттериниң деткимчезин алганнар.
ТР-ниң Чазааның парлалга албаны.