Тускай шериг операциязының хоочуннары Эртине Кара-Сал биле Азият Догдугаш Тываның көдээ ажыл-агый техникумунга патриотчу ужуражылганы эрттирген. Хоочуннар регионнуң «Тываның маадырлары» кадрлар программазының тиилекчилери база «Билиг» ниитилелиниң лекторлары болуп турар. Ужуражылгага 60 ажыг сургуулдар база тускай шериг операциязының киржикчилери болгаш оларның өг-бүле кежигүннери келген.
Эртине Кара-Сал амгы үеде «Ада-чурт камгалакчылары» фондунуң салбырының удуртукчузунуң оралакчызы болуп ажылдап турар. Чурту дээш мурнуку одуругда тулчуп турар оолдарның мурнунга хүлээлгени, бот-боттарынга дузалажырының, шериг албанныгларның сонуургалдарын камгалаарынга күрүнениң системалыг ажылының дугайында сургуулдарга ол чугаалаан.
«Билиг» российжи ниитилелдиң башкылары болганывыста, биске аныяктар-биле дорт болгаш шынчы чугааны чорудары чугула. Бо хүнде көдээ ажыл-агый техникумунуң сургуулдары регионнуң болгаш чурттуң аъш-чеминиң айыыл чок чоруун хандырар келир үениң специалистери-дир. Оларга Ада-чурт камгалалының дугайында чугаалап тура, төрээн черинге оларның күш-ажылы – Россияның күчү-күжүнге болгаш хамаарышпас чоруунга үлүг-хуузун киирген фронту-дур деп үзел-бодалды чедирер бодалдыг бис. Оларның чырып турар карактарын болгаш сеткилинден сонуургап олурарын көөрү дыка өөрүнчүг болду» - деп, Эртине Кара-Сал демдеглээн.
Крап береттиң эдилекчизи Азият Догдугаш бодунуң дайынчы оруунуң төөгүзүн чыылганнар-биле үлешкен. Шериг албан-хүлээлгезинден эгелээн, ооң соонда тускай сорулгалыг 21-ги «Тайфун» отрядтың кезек командири болгаш снайпери чораан. Соңгу Кавказ операциязынга үш катап киришкеш, эрес-дидим чоруу дээш 2015 чылда крап берет кедер эргени чаалап алган. Курлавырже халашкан соонда, башкы ажылынга бодун бараалгаткан, ынчалза-даа 2022 чылда тускай шериг операциязы эгелээрге, ол бодунуң күзели-биле Чепсектиг Күштерниң одуруунче эглип келген. 2023-2024 чылдарда «Ахмат» бөлүүнге шериг албанын эрттирген.
Амгы үениң дайынчы чепсеглээшкини сургуулдарның онза сонуургалын оттурган. Оолдар ок-чепсекти тудуп-суйбап, оларның онзагайын база амгы байдалдарында ажыглалын сонуургап айтырганнар.
«Мындыг ужуражылгалар кижиниң сагыш-сеткилин аңдара тудуптар - деп, 2-ги курсчу Монгуш Кайгал-оол бодалы-биле үлешкен. – Телевизордан патриотчу чорук дугайында бо-ла дыңнап турзувусса-даа, кажан шын маадырлар силерниң мурнуңарга туруп келгеш, силерниң карааңарже көрүп алгаш, албан-хүлээлге болгаш Төрээн чуртка ынакшыл дугайында шыны-биле чугаалай бээрге, сагыш-сеткил хөлзеп кээр-дир. Ылаңгыя езулуг шын дериг-херекселди тудуп көрүп алганым мени өөрттү. Бо чүүл бистиң шериглеривиске улуг хүндүткелди оттурду».
Ужуражылганың төнчүзүнде «Билиг» ниитилелиниң башкылары төрээн чуртка ынакшыл чүгле дайын шөлүнге эвес, а тайбың байдалдар үезинде билиг-мергежилдерге көстүп келир деп демдеглээн. Ада-чурт камгалакчызының хүнүнге тураскааткан патриотчу хемчеглер Тыва Республиканың школаларынга, колледжтеринге, техникумнарынга база болуп эртер.
ТР-ниң Чазааның парлалга албаны.