Тываның Баштыңының даалгазы-биле регионнуң Орук-транспорт яамызы оруктарда байдалды хүннүң-не хайгаарап турар. Ол чүүл оруктарда байдалдарже дүрген хөделиринге болгаш орук шимчээшкининиң айыыл чок чоруун хандырарынга дузалаар. Регионалдыг болгаш федералдыг оруктарны хандырып турар орук организацияларының диспетчер албанының телефоннары бүдүн хүн ажылдап турар.
Владислав Ховалыг орукка оваарымчалыг чоруурун республиканың чурттакчыларынга сагындырган. «Машина мунуп чоруур чаңгыс чер чурттугларымны оваарымчалыг болурунче кыйгырып тур мен: аргажок херек чок чүве болза, ырак орукче үнмезин, удур орукче хенертен кирбезин база дүрген тормозтавазын, дүрген чоруурунуң база айыыл чок чоруурунуң чурумнарын шыңгыы сагыырын кыйгырдым» — деп, Тываның Баштыңы кыйгырган.
Тываавтооруктуң дыңнатканы-биле алырга, ноябрь 9-туң эртенги шагында регионнуң оруктарында орук шимчээшкининиң дүрүмнерин хажыткан таварылгалар болбаан, орук албан черлери чаңчыл езугаар ажылдап турар. Оон беш орук организациялары, 56 техника, 66 орук ажылчыннары орук септелгезинче хаара туттунган. Орук техниказы оруктарны база орук кыдыгларын хардан арыглап, арттар кырын болгаш айыыл-халап болур черлерге тайгакка удур сай-довуракты чашкан. Регионалдыг болгаш муниципалдыг оруктарны хандырып, сай-довуракты төп турар.
«Абакан – Ак-Довурак» («Абазаның ОТСУ» КХН), «Кызыл-Мажалык – Аяңгаты», «Бижиктиг-Хая суурже кирер орук», «Тээли суурже кирер орук» («Ак–Довурактың ОТСУ» КХН), «Чыргакы – Элдиг-Хем» («Строй-Экспресс» КХН), «Хандагайты – Ак-Чыраа» («Өвүрнүң ОТСУ» КХН), «Хандагайты – Мугур-Аксы» («Дорожник» КХН), «Кызыл – Сарыг-Сеп», «Кара-Хаак суурже кирер орук» («ДСТ КХН»), «Бай-Хаак – Балгазын», «Красноярово суурже кирер орук» («Оникс» КХН), «Кызыл – Сарыг-Сеп», «Сарыг-Сеп – Балгазын», «Бүрен-Аксы суурже кирер орук» («Сарыг-Сеп ОТСУ» КХН) орук участоктарын үстүрүп, арыглап, сай-довуракты чажып турар, «Бояровка – Тоора-Хем» автооруунда В.Л. Юрков хуу бүдүрүлге орукту хайгааралда тудуп турар.
«Кызыл – Эрзин – Моол кызыгаары» («Сая» КХН), «Самагалдай – Ак-Чыраа», «Ак-Эрик суурже кирер орук», «Ак-Эрик – Моол кызыгаарында «Шара-Суур» КЭП, «Ү-Шынаа суурже кирер орук» (Сырат ХБ) орук участоктарында харны аштап-арыглаан.
Бии-Хем кожуунда Васильевтиң ХБ оруктарны ажаап-карактап турар, «Аржаан суурже кирер орук», «Туран – Хадың», «Туран» сыын ажыл-агыйынче чедер орук», «Шивилиг суурже кирер орук», «Сушь суурже кирер орук» участоктарында ажылдар уламчылавышаан.
Улуг-Хем кожуунда Арыскан, Иштии-Хем суурларже чедер оруктарда хар хөй дүшкен, аңаа «ЧАШ» хуу бүдүрүлгениң МТЗ трактору ажылдаан. «Эйлиг -Хем» дош кежиг ам-даа быжыкпаан.
Чеди-Хөл кожууннуң оруктарында «ДСУ-17» КХН-ниң орукчулары болгаш техниказы суурларже оруктарын аштап, чогумчалыг байдалды хандырган.
«Сотый», «Калдак-Хамар», «102 км», «Чолдак-Орук», «Тээли», «Калчан», «Чолалыг», «Көдүрер-Даш» база «Северный» улуг арттар кырында оруктар эки байдалда деп Тываавтоорук дыңнаткан.
Республиканың Орук-транспорт яамызы федералдыг болгаш регионалдыг оруктарда онза байдалдар дугайында дыңнадырда, диспетчер албанының дугаарларын айтып тур: регионалдыг автооруктар («Тываавтоорук» ККА) – 8(394-22) 21108, 8-929-358-0911, федералдыг оруктар («Енисей орук эргелели» ФКА) - 8(391) 265-01-12, +79632521160. Дүрген дузаның чаңгыс аай албан чери – 112 дугаарлыг телефонда.
ТР-ниң Чазааның парлалга албаны.