Тываның Чазаа муниципалдыг саң-хөө органнарының удуртукчуларының квалификация негелделеринге дүгжүп турарын хынаар бүрүн эргени регионнуң Саң-хөө яамызынга хүлээндирген. Республиканың Сайыттар кабинеди чогуур хоойлу төлевилелин июнь 6-да деткээш, ТР-ниң Дээди Хуралынче киирген.
Кожууннуң азы хоорайның кол саң-хөөчүзү албан-дужаалче кордакчы республиканың мергежилге дүгжүп турарынга хыналданы республиканың Саң-хөө яамызының тускай комиссиязынга эртип, чөпшээрелди алган соонда, муниципалитеттиң баштыңы ону томуйлап болурун документиде айыткан. "Россия Федерациязында тус чер бот-башкарылгазын организастаар ниити принциптер дугайында" 131 дугаарлыг федералдыг хоойлу-биле 2021 чылда тургускан чаартылгалар езугаар ындыг хыналданы эртери албан.
Россияның Саң-хөө яамызы муниципалдыг саң-хөө органының удуртукчузунга квалификация негелделерин кылган. Тускай эртем-билиглии, муниципалдыг, күрүне албанында азы мергежилиниң аайы-биле ажылдаан стажы, ол албан-дужаалга эргежок херек билиглери база арга-мергежили.
Тываның Баштыңы Владислав Ховалыг кажан шапкын хөгжүлде айтырыы шиитпирлеттинип турар амгы үеде, ылаңгыя бөгүнде, республикага бо хоойлу төлевилели чугула херегин демдеглээн. «Дыка хөй чүүлдер, акшаны шын башкарганындан хамааржыр. Ынчангаш саң-хөөнү удуртуп-башкарарын боттарын бадыткаан, тургустуна берген специалистерге бээр бис. Шак ындыг шыдаар кижилерни тып, өөредир апаар» — деп, ол демдеглээн.
Владислав Ховалыг республиканың саң-хөө сайыды Орлан Достайга хоойлу төлевилелин парламентиже киирер даалганы берген.
/ ТР-ниң Чазааның парлалга албаны.
"Шын" №43 2023 чылдың июнь 14