Чаа өөредилге чылында Тываның 100 ажыг школалары «Төрээн чурттуң айыыл чок чоруунуң болгаш камгалалының үндезиннери» база «Күш-ажыл» деп эртемнерге амгы үениң дериг-херекселдерин болгаш өөредилге материалдарын алыр. «Аныяктар болгаш уруглар» деп чаа национал төлевилелдиң составынга кирген «Бүгү-ле экини уругларга» деп федералдыг төлевилелди республикага боттандырары-биле оларны алыр.
Э |
рткен өөредилге чылындан эгелеп школаларга амыдыралдың айыыл чок чоруунуң чаарттынган хевири болур «Төрээн чурттуң айыыл чок чоруунуң болгаш камгалалының үндезиннери» деп эртемни өөредип эгелээнин сагындыраалыңар. Программаже чүгле хүн бүрүнүң амыдыралынга, транспортка, бойдус хүрээлеңинге болгаш информация шөлүнге айыыл чок алдынарының дүрүмнери эвес, а шериг белеткелиниң эге билиглери база кирген.
Өөреникчилер бирги дуза көргүзериниң, шериг херээниң эге билиглерин, чыскаал, тактиктиг, часпайн адарының белеткелин болгаш эмчи дузазын шиңгээдип алыр.
Школаларга “Технология” кичээлин эрттиреринге амгы үениң дериг-херекселдери: даараныр машиналарны, демир болгаш ыяш станоктарын тургузуп, класстарны эде чаарткан. «Төрээн чурттуң айыыл чок чоруунуң болгаш камгалалының үндезиннерин» өөренир өрээлдерни ок-чепсектиң хевирлери, противогазтар, хууда камгалал дериг-херекселдери, реанимация болгаш баштайгы эмчи дузазын көргүзер херекселдер-биле дерээн.
«Ол эртемнерни чедимчелиг болгаш солун кылдыр өөредир дээш, класстарны амгы үениң өөредилге дериг-херекселдери-биле четчелеп чаарткан» – деп, Тываның Өөредилге яамызының специалистери демдеглээн.
Бо эгелээшкиннерниң ачызында республиканың школачылары келир үеде ажыктыг апаар практиктиг билиглерни болгаш мергежилдерни чедип алыр аргалыг. Бо базым амгы үениң өөредилге хүрээлелин тургузарынга, уругларга боттарының арга-шинээн ажыдып, амыдыралга белеткениринге таарымчалыг болур.
Медээни болгаш чурукту Өөредилге яамызындан алган.
“Шын” №31 2025 чылдың август 14