Сергей Күжүгетович Шойгу бөгүн 68 харлап турар. Тываның Баштыңы Владислав Ховалыг аңаа байырны чедирген.
“Байыр чедириишкиннеринге болгаш чаагай күзээшкиннерге катчып тур мен. Бүдүн республика бөгүн байыр чедириишкиннерин чаңгыс чер чурттуунче чорудуп тур боор дээрзинге бүзүреп тур мен. Шойгу – Тываның база бүгү чурттуң чоргааралы. Ооң чуртунга кылган ажыл-ижин ОБЯ-ны тургузарындан эгелээш, бистиң шериивистиң катап тургустунарынга чедир үнелел бээри ындыг амыр эвес. Ол амдыызында тодаргай хемчээттинмес улуг ажыл-ишти кылып чоруур. Ынчалза-даа ол улуг ажыл-херек Россияда болгаш оон дашкаар хөй-хөй кижилерниң чуртталгазын өскертипкен болгаш ам-даа уламчылап турарын ыяк билир бис. Меңээ эң-не кайгамчык чүүл – Сергей Күжүгетович ындыг улуг хемчээлдиг ажылды кылып чорааш безин анаа кижилерге ажык, бодунуң төрээн чер-чуртунуң берге айтырыгларынга кичээнгейлиг, төлептиг оглу болуп, бичии-даа утпайн чоруур. Аңаа быжыг кадыкшылды, күштүг болурун болгаш бүгү-ле бодап чоруур күзелдери бүдүп чоруурун күзедим!” – деп, Владислав Ховалыг бодунуң блогунда бижээн.