Якутск хоорайга болуп эрткен Россияның аныяк библиотекарьларының XII шуулганынга Тываның мурнундан Улуг-Хем кожууннуң ном саңының аныяк специалистери киришкен.
Россияның бүгү регионнарындан чыглып келген 240 ажыг ном саңының аныяк специалистерин каттыштырган шуулган ёзулуг чогаадыкчы лаборатория болуп, оожум ном кадагалакчыларының дугайында стереотиптиг бодалдар аңаа буза бастынып турган. Амгы үениң библиотекарьлары – шоумен, продюсер болгаш культура-массалыг хемчеглерниң режиссёру дээрзин шуулган көргүскен.
Түңнелинде, чаңчылчаан лекциялар дыңнаарының орнунга, шуулган киржикчилери хөй чон мурнунга канчаар сөс алырынга, актёр болгаш оратор уран мергежилинге мастер-класстарны эрткилээн. Ол ышкаш классиктиг чогаалдың таныштырылгазын сонуурганчыг квест болдуруп, социал четкилерге кылымал угаан ажыглап креативтиг макеттерни тургузарын өөренип алганнар. Оон аңгыда аныяк-өскенниң номга сонуургалын оттурары-биле эргижирээн аргалардан уштунуп, ажылдың хевирин бүрүнү-биле өскертир дугайында дискуссиялар база болгулаан. Шуулганның төнчү кезээнде III Бүгү-россияның библиотека төлевилелдериниң аныяктар аразынга мөөрейиниң түңнелин үндүрген.
Шуулганның киржикчилеринге “Олонхо чурту-биле таныжылга” деп аттыг литература-театржыткан экскурсияны организастаан. Якут чоннуң Алгыс национал ёзулалы-биле арыглаашкын, “Дом Арчы” культура төвүнге театржыткан көргүзүү, ЮНЕСКО-же кирген материалдыг эвес культураның өнчүзү кылдыр санадыр якуттарның маадырлыг эпозу-биле таныштырылга болган.
“Бо шуулганга алган билиглеривис биске чаа технологияларны ажыглап тургаш, солун төлевилелдер тургузарынга болгаш моон-даа соңгаар кожуунувустуң библиотека системазын улам сайзырадырынга улуг деткимче болур” – деп, Улуг-Хемниң төп кожуун библиотеказының аныяк специалистери чугаалаан.
Дараазында шак ындыг шуулган 2028 чылда Самарага болур.
/ Бистиң корр.
Чуруктарны болгаш медээни ТР-ниң Культура яамызындан алган.
“Шын” №27 2026 чылдың июль 16
"Шын" солуннуң МАХ-каналынга каттыжыңар: max.ru/channel_shyn