Бөгүн, ноябрь 26-да, Тываның В. Көк-оол аттыг Национал хөгжүм-шии театрынга Тываның X Камбы-ламазы болур Геше Гелонг Лоден Шираб башкының дүжүлгезинге саадаан ыдыктыг ёзулалы болуп эрткен.
Аңаа ТР-ниң Чазак Даргазы Владислав Ховалыгга баштаткан чазак кежигүннери, күүсекчи болгаш хоойлужудулга эрге-чагыргаларның удуртукчулары, республиканың хөй-ниити организацияларының төлээлери болгаш Россияның сарыг шажын чүдүлгелиг регионнарындан Камбы-ламалары болгаш даштыкы чурттардан хөй санныг аалчылар дээш өске-даа чүдүкчү чон чыглып киришкен.
Чаа соңгуттурган Камбы-ламаны Тываның шажын-чүдүлге баштыңы кылдыр олуртур ёзулалын шажын дүрүмүнге дүүштүр эрттиргеш, чогуур чурумнарын сагып чоруткан.
— Үндезин Башкымга, үш ховар Дээдилерге тейледим!
Мен Лоден Шираб Тываның Камбы-лама дүжүлгезин хүлээп тура, үш ховар Дээдилерге, чонумга даңгыраам берип тур мен. Ыдыктыг Тыва чер чуртувуска өгбелеривистиң арттырып кааны дээди Будда башкывыстың эртем-өөредиин уламчылап, тыва чонувустуң бурунгу ужурлары сиңген сарыг шажын чүдүлгевисти кадагалап делгередирин, хөй янзы чоннар чүдүлгезиниң аразынга амыр-тайбың хүндүткелдиг болурунга, келир үениң салгалдарынга Будда башкының эртем-өөредиин дамчыдарынга улуг үлүг-хуумну киириштирерин силер бүгүдеге даңгыраглап тур мен. Очалаңның хилинчек човулаңындан амылыглар адырлып, аас-кежиктиң, чыргал-дыштың чылдагаанын тывар болзун! — деп, Тываның X Камбы-ламазы болур Геше Гелонг Лоден Шираб ёзулал үезинде регионнуң шажынчы амыдыралында чаа чаданың эгелээнин илереткен ыдыктыг даңгыраан берген.
Тываның чаа Камбы-ламазы даңгыраан берген соонда, ТР-ниң Чазак Даргазы Владислав Ховалыг республиканың бүгү чонунуң мурнундан Геше Гелонг Лоден Шираб башкыга дүжүлгезинде саадап олурганы дээш, байыр чедирип, төрээн Тывазы, төрел чону дээш буянныг ажыл-ижинге чедиишкиннерни, ам-даа улуг бедиктерни ажып эртерин күзээн.
Ооң соонда Россияның сарыг шажынчы регионнарындан чаладып келген хүндүткелдиг Камбы-лама башкылар чаагай күзээшкиннерлиг байыр чедириишкиннерин кылган хүндүлүг аалчыларның киржилгези-биле хемчегниң албан ёзузунуң кезээ доостурга, дүжүлгеже олурар ёзулалдың эң чугула болгаш ханы уткалыг кезээ эгелээн. Ол дээрге буян чыылдазының күштүг демдээ, материалдыг чүүлдерден артык сүлде-сүзүктүң мурнады хөгжүлдезин болгаш буддийжи Өөредиглерни сагып чоруурун илереткен мандаланы өргээн. Ол ышкаш дүжүлгеге олурар ёзулал үезинде төвүт болгаш тыва дылда мөргүлдерни лама башкылар номчаан.
Сагындырып каар чүүл — Тыва Республиканың Камбы-ламазының сөөлгү соңгулдалары 2025 чылдың октябрь 4-те болуп эрткен. Республиканың сарыг шажын лама башкыларының бадылаашкыны-биле республиканың буддистериниң чүдүлге баштыңы кылдыр Гелонг Лоден Шераб, анаа ады Долаан Александрович Уржанай соңгуткан. Ол Индияның Дрепунг Гоманг хүрээзинге буддийжи философияның долу он алды чыл өөредилгезин дооскан. Кызылда Тубтен Шедруб Линг буддийжи хүрээде чоокта чаа ажыттынган Россияның буддийжи университединиң ректору кылдыр Гелонг Лоден Шерабты томуйлаан.
Бистиң корр.
Буян ООРЖАКТЫҢ тырттырган чуруктары.