Октябрь 19-та Орус культура төвүнге Тываның Журналистер эвилелинге база бир кол болууш- кун – беш чылда чаңгыс болур отчёт-соңгулдалыг конференциязы болуп эрткен. Аңаа конференция киржикчилери эвилелдиң даргазын, баштаар чериниң даргазы болгаш кежигүннерин, ревизия комиссиязын, улуг жюриниң даргазын соңгуп, Уставында эдилгелерни сайгарып чугаалашкан.
Ниитизи-биле конференцияга республиканың массалыг информация чепсектериниң профессионал ниитилелиниң кежигүннери, тыва журналистиканың хоочуннары, кожуун солуннарының редакторлары, аныяк журналистер, фотографтар шупту идепкейлиг киришкен.
Конференцияны журналистер кажыыдал минутазындан эгелээн. Чүге дээрге беш чыл дургузунда эвилелдиң 10 кежигүнү чырык өртемчейден чарлып чоруткан. Ылаңгыя өске чылдарга бодаарга, 2025 чылда чидириг хөй болуп, 4 хоочунну журналистер сөөлгү оруунче үдээн болуп турар.
Хүн чуруму ёзугаар конференцияның бирги айтырыы – беш чыл хуусаада кылып чоруттунган ажылдың долу отчёдун эвилелдиң даргазы Эльвира Лифанова чыылганнарга таныштырган. Ол үениң дургузунда эвилелдиң эң-не улуг чедиишкини – Бүгү-россияның журналистериниң Сочиге чылдың болур шуулганынга Тываның Журналистер эвилели киришкеш, шуулганның кол шаңналдарын ийи удаа чаалап ап турганын демдеглеп, чылдың болур “Чонар-даштан бийир” журналистерниң профессионал мөөрейлерин эрттирип, янзы-бүрү регионалдыг болгаш федералдыг төлевилелдерге, акцияларга база ТШО-га ачы-дуза чыылдазынга чаңгыс эвес удаа киришкенин, өөреникчилер болгаш студентилер аразынга журналист мергежилге сонуургалын оттурар сорулгалыг ужуражылгаларны, тематиктиг кежээлерни болгаш тыва журналистиканың архивин тургузар сорулгалыг “Журналист мен” деп төлевилел ёзугаар 8 хоочун журналист-биле бижиткен теледамчыдылгаларны ТР-ниң Национал архивинче дужаагаш, ол ажылды ам-даа уламчылаар сорулганы салып турарын, өске чылдарга деңнээрге, эрткен беш чыл дургузунда эвилелче кирген кежигүннерниң саны оранчок хөй болган – 70 чаа кежигүн немешкенин, бо хүнде эвилелде бактаап турар 159 кежигүннүң 112-зи дадывыр төлевейн турарын база чугаалаан. Ол болгаш өске-даа кылган ажылдың долу медээзин конференция киржикчилери дыңнааш, эвилел даргазының отчёдун хүлээп алганнар.
Үениң аайы-биле журналистерниң Уставы өйлеп-өйлеп чаарттынып турар. Бо удаада ында кирген чаартылгаларынга хамаарыштыр конференция киржикчилери боттарының санал-оналдарын берип, сайгарып чугаалашкаш, бир үн-биле деткип, бадылап алган. Конференция киржикчилериниң четтик- пейн манааны база бир айтырыг – эвилел даргазынче кымны соңгууру болган. Конференция киржикчилери аңгы-аңгы кандидатураларны идип үндүрүп, элээн сүмелешкен. Түңнелинде эвилелдиң чаа даргазынга “Тыва” КТРК-ның медээ албанының даргазының оралакчызы Константин Куцеваловту журналистер бир үн-биле соңгуп алган.
Устав ёзугаар соңгуттурган дарга эвилелдиң баштаар чериниң даргазын болгаш кежигүннерин боду шилип, чыылганнарга бадылаткан. ТР-ниң алдарлыг журнализи Карина Монгушту ооң даргазынга хевээр арттыргаш, кежигүннеринге: ТР-ниң алдарлыг журналистери Эльвира Лифанова, Виталий Кузнецов, ТР-ниң культуразының алдарлыг ажылдакчызы, хоочун журналист Орлан Дамба-Хуурак, Тываның национал музейиниң Чадаанада салбырының директору Доржу Монгуш, “Звезда” радионуң редактору Эрес Монгуш, “Тыва” КТРК-ның журналистери Виктория Ооржак биле Алдынай Монгуш соңгуттурган. Оон аңгыда эвилелдиң ревизия комиссиязының даргазынга Иван Макаровту хевээр арттыргаш, ТР-ниң алдарлыг ажылдакчызы Тамара Кабимульдинованы улуг жюри даргазынга соңгаан.
Конференция соонда дораан Тываның Журналистер эвилелиниң баштаар чериниң чаа составы бирги хуралын эрттиргеш, кылыр ажылдың планын тургузуп, кымның кандыг угланыышкын-биле ажыл чорударын хуваажып алган.
Ол хүн тыва журналистиканың профессионал ниитилелиниң удуртур-баштаар черлеринге соңгуттурганнарга чыылганнар чедиишкиннерни күзеп, моон-даа соңгаар чаа-чаа дидим эгелээшкиннерни боттандырып, республиканың хөгжүлдези дээш шупту демниг ажылдаарын күзээннер.
Бистиң корр.
Наталья Черноусованың тырттырган чуруктары.
«Шын» №41 2025 чылдың октябрь 23