Ол дугайында Тыва Республиканың Баштыңы Владислав Ховалыг бөгүн дыңнаткан.
«Бөгүн республиканың «Тываның кадет корпузу» школа-интернадының 83 кижизиттирикчери Шира хөлдүң чанында санаторийже чорупканнар. Уругларывыска кадыын катап тургузар ындыг дыштанылга эргежок чугула. Олар Чаа чылды база аңаа уткуурлар. Бистиң уругларывыс, ылаңгыя өг-бүлениң сагыш салыышкыны болгаш чылыы четпейн турарлары, үргүлчү санаторийлерже болгаш өске-даа дыштанылга черлеринче чоруп турары күзенчиг болбайн аан. Чүгле мындыг таарымча чок байдалдарда эвес.
Бистиң ажы-төлүвүстүң дыштанылгазын дарый организастаан өөредилге болгаш кадык-камгалал яамыларының демниг ажылын демдеглекседим.
Республиканың школа-интернадынга хөй ажы-төл хораннанганының чылдагааннарын долузу-биле тодараткаш, шупту чурум үрээшкиннерин узуткаваан шаанда, байдалды бодум хыналдамдан үндүрбес мен» деп В.Т.Ховалыг айыткан.