2021 чылдың түңнелдери-биле, Россия Федерациязының субъектилериниң социал-экономиктиг байдалының рейтингизинде Тываның ээлеп турар туружу экижээн.
Тываның экономиктиг хөгжүлде болгаш үлетпүр сайыды Айдыс Сат бистиң регионувустуң деңнелин тодарадып турар 18 көргүзүглерден 13 көргүзүгде байдалдың экижээни илереттинген, 4 көргүзүгде байдал кудулаан дээрзин дыңнаткан. Эң-не эки көргүзүглер социал адырда (чоннуң ядамык чоруунуң, ажылга хаара туттунганының деңнели, ажыл кылыр арга-шинектиг чоннуң өлүп-хорап турарының көргүзүү, чоннуң ортумак чурттаар назынының өзүлдези), экономиканың деңнелиниң көргүзүглеринде (каттышкан бюджеттиң киирген орулгазы, экономикада хаара туттунган кижилерниң саны, үүрмек саарылганың хемчээли), бюджет адырының көргүзүглеринде (каттышкан бюджеттиң киирген орулгазының чоннуң кижи санынга хувааган хемчээли) демдеглеттинген. Ооң түңнелинде Тыва 2021 чылдың көргүзүглери-биле 13,563 баллга үнелеттирген (эрткен чылдыынга деңнээрге 1,328 балл хөй). Ынчангаш Тыва рейтингиде 84 дугаар олуттан 83 дугаарынче бир чада өрү көдүрүлген.
Бодаарга, өкпеленчиг ышкаш сагындырар, херек кырында коронавирус хамчыының кызыгаарлаашкыннары, барыын чүк чурттарының кызагдаашкыннары-биле капсырлаштыр, ам-даа шиитпирлеттинмээн Тываже орук-суур, транспорт болгаш энергодефицит айтырыглары чидиг хевээр артып турда, республиканың бир чада безин өрү көдүрүлгени эки көргүзүг болуп турар. Ол каш баллдың артында күжениишкинниг улуг ажыл-иш турар. Ынчангаш чедип алган көргүзүглерни кудулатпайн, ам-даа өрү бедип үнери-биле ажылды чорудары чугула, чүге дизе шак бо сан-чурагайлар дээрге-ле Тываның чурттакчы чонунуң кижи бүрүзүнүң ажыл-амыдыралы, чаагай чоруу-дур.
Шак бо көргүзүглерниң экижээнин тус черниң эксперттери республиканың удуртулгазының солушканы-биле холбаштырып турар. Ылаңгыя Тываның Баштыңы Владислав Ховалыгның республиканың социал-экономиктиг хөгжүлдезиниң тускайлаң программазында үре-түңнел чок болур хире чамдык төлевилелдерни өске угланыышкыннарже боттандырганы салдар чедирген.
Ук рейтингини Москва, Санкт-Петербург, Татарстан, Ханты-Манси автономнуг округ – Югра баштап турар.
Мерген Кыргыс.
Чурукту интерне тчеткизинден алган.