Диис болгаш тараа
Бир кырган садыг баар деп баргаш:
– Тараа садып алгаш, диисти чемгерер болза эки-дир – деп чугааланган.
Уйнуу ону дыңнааш, кайгап:
– Кырган-ачай, диисти тараа-биле чемгерер деп турарың ол бе, кай? Дииске кадык хайындырып бээр сен бе?
– Дииске каяа кадык хайындырар ийик мен, оглум. Чадавыс кырынга тараа чажып каарымга, хөкпештер тараа чыып чиир дээш ужуп келгеш, чада кырынга хонуптарга, диис ону тудуп чипкей – деп-тир.
Өөредиг:
Чуртталгада база шак-ла ындыг. Чединмес кижиге дузалажыр дизе, балык шелип алыр сыырткыышты тутсуп бер!
Эзир биле кодан
Бир катап эзир ыяш будуунга чүнү-даа кылбайн, анаа олурган. Кодан ону көргеш:
– Мен база силерниң ышкаш чүнү-даа кылбайн олурайн бе? – деп айтырып-тыр.
– Ынчанмайн канчаар, чүге болбас боор – деп харыылаан.
Кодан эзирниң олурган ыяжының адаанга чүнү-даа кылбайн дыштанып олурган. Хенертен дилги халып келгеш, коданны сегирип алгаш, чипкен.
Өөредиг:
Чүнү-даа кылбайн, анаа олурар дизе, бедик черге олурганы дээре.
Акша
Бир-ле катап такси чолаачызы бир билдингир бай кижини чедер черинге чедирип чораан. Дүжер чери кээрге, такси өртээн артыкшыл чокка санашкан.
Чолаачы олуруп-олуруп:
– Дүүн мен силерниң оглуңарны чедирип чордум. Ол мээң-биле санашкаш, 100 долларны шайлаар сен дээш, база немеп берди – деп-тир.
– Чүү деп бодаар силер, ооң ачазы аажок бай кижи-дир, а мен өскүс кижи ышкажыл мен.
Өөредиг:
Акшаны чүгле боду ажылдап алган кижи үнелээр.
Дарга
Бир-ле катап дарга, секретарь, менеджер үжелээн дүъштеки чем чип алыры-биле кафеже кылаштажыпкан. Кудумчуга Алладинниң лампазын тып алганнар. Ооң довурак-доозунун чодуп, сонуургап тургаш, билбейн, лампаны аштаптарга, Джин чугааланы берген. «Кижи бүрүзүнүң чаңгыс-чаңгыс күзелин бо дораан бүдүрер мен» – деп-тир.
Бир-ле дугаарында секретары мурнун былаажып:
– Далай кыдыынга изиг хүн караанга дөгеленип чыдыксап тур мен – дээн. Ол-ла дораан секретарь далай кыдыынга барган.
Улаштыр менеджери:
– А мен болза изиг чурттарга баргаш, катерге олурупкаш, чүнү-даа кылбайн аян-тээлеп чоруксап тур мен – деп, күзелин илереткеш, ол-ла дораан чиде берген.
– Эң сөөлүнде артып калдыңар, силер чүнү күзеп тур силер? – деп, Джин даргадан айтырган.
Дарга үр-даа боданмайн:
– Бо ийи чалгаапайлар, дүштеки чем дооступ турда, офиске дедир чедип келзин – деп харыылаан.
Өөредиг:
Кажан-даа, каяа-даа эге сөстү даргаңга берип чор.
Улуг сек
Бир-ле катап мерген угаанныг башкы өөреникчилеринге чаңгыс улуг сек чураан ак саазынны көргүскеш:
– Чүнү көрүп тур силер? – деп айтырган.
Шупту барык деңге чыгыы улуг секти көрүп турарын чугаалааннар. Шын эвес харыы болган.
– Таанда-ла, чаңгыс хензиг улуг секке бодаарга, улуг ак саазын көзүлбес болганы ол бе?
Чуртталгада база шак-ла ындыг, хөй кезиинде бир-ле дугаарында кижилерниң багай талазын иле тыртып алыр, эки талалары чеже-даа хөй болза, ону эскербес.
Каш-ла санныг кижиге «ак саазын» көскү болур.