“Улаатай” — дээди шаңналдың эдилекчизи

Апрель 21–23 хүннеринде Абаканга делегей чергелиг «КИТ – 2023» деп мөөрей болуп эрткен. Ол культура уран чүүл адырында хөй жанрлыг улуг хемчээлдиг төлевилел болуп турар. Бо мөөрей чурттуң хөй хоорайларын хаара тударындан аңгыда, эң-не хөй номинацияларлыг болуп турар: вокал, хореография, инструменталдыг күүселде, фото-чурук база каасталга-кылыглар уран чүүлү, чурулга уран чүүлү, мода театры, театр, уран сөс, цирк, кино уран чүүлү, мультипликация, конферанс, цирк уран чүүлү, тускай жанр.

Аңаа Тываны төлээлеп уругларның шилиндек чогаадыкчы коллективтери, Тываның политехниктиг техникумундан Улаатай аттыг хореография коллективи “Мода театры”, “Улустуң танцызы”, “Этниктиг танцы”, “Уран сөс” деп номинацияларга киришкен.

Москвадан культуролог, стилист-имиджмейкер М.Ю. Строгановага баштаткан аңгы-аңгы хоорайлардан келген билдингир культура ажылдакчылары мөөрейниң жюри кежигүннери болган: Кемеровонуң күрүне институдунуң хореография факультединиң деканы Р.Н. Моисеенко; ТНТ телеканалда “Танцы” телешоунуң киржикчизи, Россияның болгаш даштыкы чурттарның шоу-бизнес сылдыстарының балетмейстери, РФ-тиң шеригниң ыры болгаш танцы ансамблиниң солизи турган Р.И. Земляницына (Москва); Россияның болгаш Татарстанның алдарлыг артизи, Новосибирскиниң күрүне филармониязының солизи, эстрада вокалының башкызы Д.И. Ворфоломеева (Новосибирск); РФ-тиң алдарлыг артизи, Новосибирскиниң күрүне филармониязының солизи, академиктиг вокал башкызы О.Г. Осипова (Новосибирск).

Бо хире улуг жюриниң бедик үнелелин алыры алдар болбастың аргазы чок. Тывадан барган мөөрей киржикчилериниң хореография номерлерин, ылаңгыя “Мода театры” номинацияга “Кыс-Даштар” этноколлекцияның көргүзүүн онзалап демдеглээн.

Түңнелинде, Тываның техникуму “Улустуң танцызы”, “Мода театры”, “Этниктиг танцы” номинацияларга 1-ги чергениң лауреаттары болган. Аңаа немей “Чоннуң ёзу-чаңчылдарын кадагалап арттырган болгаш сайзырадып чорууру” дээш тускай медаль болгаш дипломга төлептиг болган. Иван Трыков “Владимирниң монологун” номчуп күүсеткеш, “Уран сөс” номинацияның 2-ги чергениң лауреады болган.

Эң-не кол шаңнал – мөөрейниң Гран-призин “Улаатай” тиилеп алгаш, Санкт-Петербург, Сочи, Анапа – бо үш хоорайның кайы-бирээзинге болур финалга киржир чалалга-биле шаңнаткан.

/ бист.корр

"Шын" №30 2023 чылдың апрель 26