Эртем хүнүнге тураскаадып, “Тюркология” эртем-өөредилге төвүнүң ажылдакчылары, филология эртемнериниң кандидаттары, улуг эртем ажылдакчылары Аэлита Салчак база Аржаана Хертек Кызылдың транспорт техникумунуң МЭЭП-31 бөлүүнүң 3-кү курузунуң сургуулдарынга экскурсия кичээлдерин эрттирген.
Эртем-өөредилге төвүнүң удуртукчузу Аэлита Салчак төптүң кол угланыышкыннарын, боттандырган төлевилелдерин болгаш оларның түңнелдерин чугаалаан. Сургуулдарга эртем-өөредилге төвүнүң шинчилел ажылдарының түңнелдерин база көргүскен. Оларга “Тываның чогаалчылары”, “Тыва дылдың сөзүглелдериниң электроннуг корпузу” деп сайтылар хамааржыр. Ол ышкаш тыва-орус болгаш орус-тыва электроннуг сөстүктүң база очулдурукчунуң херек кырында ажыглалын база көрген.
Эртем төвүнүң кол эртем ажылдакчызы Аржаана Хертек төптүң чедиишкинниг ажылдап турар “Тываның литературлуг өнчүзүн чурагайжыдары” деп студентилерниң эртем бөлгүмүнүң ажылы-биле таныштырган. Бөлгүмнүң иштинде грамматиканың, өзек дыл эртеминиң болгаш чогаалдарның тыва дылче очулгазынга хамаарышкан чидиг айтырыгларны көрүп турар. Бөлгүмнүң кежигүннери орус, тыва сөзүглелдерни деңнээр, дөмей болгаш ылгалдыг чүүлдерин, орус сөзүглелдерде лексемаларның (чаңгыс дазылдыг сөстерниң) болгаш оларның тыва дылче очулгаларында ылгалып турар демдектерин тодарадып турар.
Тыва чогаалдарның сөзүглелдеринде лексиктиг болгаш грамматиктиг кезектериниң хүлээлгелерин шинчилээринче, орус чогаалдарның тыва дылче очулгазының онзагай аргаларын тодарадырынче онза кичээнгейни угландырган.
Лекция транспорт техникумунуң сургуулдарының сонуургалын оттуруп, кичээнгейин хаара туткан. Оларның куратору Өлзей Ооржак-биле улаштыр кады ажылдажылга дугайында чугаалашкан.
ТывКУ-нуң медээлеринден Чыжыргана СААЯ белеткээн.
«Шын» №9 2024 чылдың февраль 7