Националдар херектериниң талазы-биле федералдыг агентилел 2025 чылдың ноябрь 1-ден 8-ке чедир партнёрлары-биле кады, «Улуг этнографтыг диктант» деп Бүгү-российжи он дугаар чырыдыышкын акциязын эрттирер. Он дугаар юбилейлиг эртип турар акция бүгү-российжи хамааты бот-тускайлаң чорукту быжыглаар, орус чаңчылчаан сүлде-сүзүк-мөзү-шынар үнелиг чүүлдерин нептередир, төөгүнү өскертир дээн оралдажыышкыннар-биле демисежир угланыышкынныг.
Чоннуң чаңгыс деминиң хүнүнүң бүдүүзүнде эртер акция онлайн база -хевирлиг болур. Организакчының дыңнатканы болза, республиканың 50 ажыг муң чурттакчызы диктантыга киржир. Олар республика девискээринде организастаан 30 ажыг шөлге болуп эртер.
Диктант чаңгыс доктааттынган үеде, тодаргайлаарга, ноябрь 1-де 00.01 шактан ноябрь 8-тиң 23.59 шакка чедир (Москваныы-биле) www.miretno.ru сайтыга онлайн хевирге болур. Эртем-билии, социал байдалы, шажын-чүдүлгези база хамааты эргези хамаанчокка, Россиядан база даштыкы чурттардан күзелдиг кижилер диктантыга киржип болур. Назы-харда кызыгаарлаашкын чок.
Диктантының онаалгаларын 2 аңгы назы-харга таарыштыр тургускан: 16 харга чедир киржикчилерге 20 айтырыг, 16 хардан улуг назылыг киржикчилерге 30 айтырыг бар. Айтырыг бүрүзүнде шын харыыны шилип алыр элээн каш харыыларны салган.
Диктант алды аңгы темалыг: Россияның национал политиказының күүселдези; чурттуң административтиг-девискээр тургузуу болгаш регионнарның онзагайы; чурттуң болгаш чамдык регионнарының төөгүзү; күрүне болгаш республика дылдары; материалдыг культура өнчү салгалы; материалдыг эвес культура өнчү салгалы. Шупту даалгаларны күүседиптерге, эң хөй балл — 100. Киржикчилерге диктант бижииринге 45 минутаны бээр.
Онлайн хевирге киришкен киржикчиниң түңнелдерин айыткан сертификат диктантыны эрткен соонда көстүп кээр болгаш, 2025 чылдың декабрь 25-ке чедир электроннуг хевирге киржикчиже чорудар.
«Улуг этнографтыг диктант» Бүгү-российжи чырыдыышкын акциязының дугайында элээн тодаргай медээни www.miretno.ru сайтыдан база ВКонтактеде vk.com/miretno албан ёзунуң бөлүүнден билип ап болур.
Бистиң корр.
Чурукту интернеттен хоолгалаан.
«Шын» №41 2025 чылдың октябрь 23