Дүүн, декабрь 29-та, Тубтен Шедруб Линг хүрээзиниң девискээринге туттунган дош хоорайжыгаштың байырлыг ажыдыышкыны болган.
Россияда эң-не улуг сарыг шажын хүрээзиниң девискээринде дош-биле кылган Чөөн чүк календарының демдектери - 12 аң дүрзүлерин болгаш Будда Шакьямуниниң хевирин хүрээниң кожазында Кызылдың Президентиниң кадет училищезиниң сургуулдары база хоорайның чурттакчылары көөр аргалыг болган.
Күжүгет Шойгу аттыг культура фондузунуң база регионнуң Культура яамызының деткимчези-биле бо төлевилелди боттандырган.
ТР-ниң культура сайыды Виктор Чигжит байырлыг хемчегни ажыдып тура, Кызылдың уран чүүл колледжизиниң сургуулдарынга болгаш Тываның чурукчуларынга, чыккылама сооктар дивейн, мындыг чараш «дош тоолду» кылганы дээш өөрүп четтиргенин илереткен.
«Бамстройпуть» акционерлиг ниитилел биле «Ойна» алдын артелиниң деткимчези эвес болза, мындыг кыска хуусаа дургузунда Тываның чурттакчыларынга мындыг чараш дош хоорайжыгаш кылыры болдунмас турган» — деп, Виктор Чигжит чугаалаан.
Байырлыг ажыдыышкынны театржыткан көргүзүг-биле уламчылаан. Соок-Ирей биле Харжыгаш чыылганнарга Чаа чыл уткуштур байырын чедирген.
Найысылалдың чурттакчызы Алдын-Сай Монгуш өөрүшкүзүн илереткен: «Бажыңывыстан ырак эвесте дош хоорайжыгаш тыптып келгенинге дыка өөрүп тур бис. Ылаңгыя кежээки үелерде бо дүрзүлер аңгы-аңгы өңнерлиг чырып эгелээр. Ажы-төлүм дош хоорайжыгаштың ажыдыышкынын четтикпейн манап турдулар. Чаа чылдың дыштаныр хүннеринде ёзулуг белек болду».
Шагаага чедир дош хоорайжыгаштың эжиктери Тываның чурттакчыларынга болгаш аалчыларынга кезээде ажык. Дош хоорайжыгашка чуңгулап кээрде, эки чылыдыр кеттинип алыр болгаш айыыл чок чорукту сагыырын сагындырып турар.
Бистиң корр.