«Маадырныӊ партазы» деп патриотчу төлевилелге бүгү чурттуӊ школалары киржип турар. Сентябрь 15-те Кызылдыӊ 2 дугаар школазынга «Маадырныӊ партазыныӊ» байырлыг ёзулалы болуп турган.
Ол маадырны улуг лейтенант Дүгер Орланович Бамба дээр. 2001 чылда Кызылдыӊ 2 дугаар школазыныӊ 1-ги клазынга өөренип киргеш, 9-ку классты дооскаш, Омскиниӊ эмчи академиязыныӊ чанында колледжинче дужаап кирип алган. Эмчи колледжин чедиишкинниг дооскаш, Рязань хоорайда Агаар-десантыларыныӊ дээди гвардейжи команда училищезинге өөренип кирген. Шериг мергежилдиӊ дипломун холга алган. Дүгер Бамбаны 11-ги армейжи корпустуӊ 79-ку гвардейжи тускай даг-адыгжы бригадазыныӊ разведка взводунуӊ командири кылдыр томуйлаан. Элээн үе болганда, ол агаар-десант белеткелиниӊ талазы-биле рота командириниӊ оралакчызыныӊ эрге-дужаалын эдилеп, шериг албанын күүседип турган. Ол бодунуӊ Ада-чуртун камгалаар деп быжыг даӊгырактыг шериг эш-өөрү-биле дөмей, тускай шериг операциязынга киржип турган. Бердинген даалганы күүседип тургаш, маадырлыы-биле мөчээн.
Улуг лейтенант Дүгер Орланович Бамбаны «Эрес-дидим чоруктуӊ Ордени-биле» шаӊнаан.
Маадырлыг чорукту кадыг-бергеге дадыккан, экер-эрес, ёзулуг шиитпирлиг, чүреккир кижилер кылып шыдаар. А улуг лейтенант Дүгер Бамбаны шак ындыг үлегерлиг маадырларныӊ бирээзи дээрзин Кызылдыӊ 2 дугаар школазыныӊ башкылары болгаш өөреникчилери эки билир.
Улуг лейтенант Дүгер Орланович Бамбаныӊ эртем-билигни шиӊгээдип өөренип чораан школазынга «Маадырныӊ партазын» байырлыг ёзу-биле тургускан.
«Маадырныӊ партазын» тургузар байырлыг ёзулал улустуӊ сагыш-сеткилин доюлдуруп келир, өөрүнчүг-даа, муӊгаранчыг-даа. Ындыг-даа бол, амыр-тайбыӊ чуртталга дээш демисежири, төрээн чуртун камгалаары белен эвес хүлээлге болгай. Чидириглер турары — чайлаш чок.
«Маадырныӊ партазыныӊ» байырлыг ёзулалынга школаныӊ өөреникчилери, башкылары, улуг лейтенант Дүгер Орланович Бамбаныӊ чоок төрелдери, Дээди Хуралдыӊ Аппарадыныӊ удуртукчузу Маадыр Успун, Тыва Республиканыӊ Шериг комиссариадыныӊ шериг баар оолдар белеткээр килдис даргазы, майор Владимир Ондрак, Тывада Юнармия шимчээшкининиӊ удуртукчузу Айдыӊ Шивидек, «Ада-чурт камгалакчылары» күрүне фондузунуӊ регионалдыг салбырыныӊ төлээзи Азият Догдугаш киржип, маадырга мөгейген.
«Ада-чурттуӊ камгалакчыларын — Маадырларны өзүп олурар салгалдар билир ужурлуг. Төрээн чуртун камгалап, салдынган сорулгазын, даалгазын күүседип тургаш, мөчээн чаӊгыс чер чурттугларывысты, оларныӊ маадырлыг чоруун кажанда-даа утпайн, сактып чоруур ужурлуг бис» — деп, «Ада-чурт камгалакчылары» фондунуӊ регионалдыг салбырыныӊ төлээзи Азият Догдугаш чугаалаан.
Улуг лейтенант Дүгер Орланович Бамбаныӊ дугайында «Маадырныӊ партазында» тодаргай медээлерни бижээн.
Р. Демчик белеткээн.