Россияныӊ Социал фондузу улуг назылыг кижилерге тускай төп тургузар чаа төлевилелди эгелеп турар. Ону амыдыралга шенеп боттандырар регионнарныӊ санынче Тываны киирген.
Республикага эге дээрезинде улуг назылыгларныӊ ийи төвүн ажыткан. Бирээзи – Кызыл хоорайныӊ, а өскези – Бии-Хем кожууннуӊ Социал фонд салбырларында. Туран хоорайга бо ийи төптуӊ ужуражылгазы болуп эрткен.
Тывада Социал фонд салбырыныӊ даргазы Светлана Кенден, Регионалдыг пенсионерлер эвилелиниӊ даргазы Алла Хурума, Бии-Хем кожууннуӊ чагырыкчызыныӊ оралакчызы Орлан Байкара болгаш тус черниӊ хоочуннары, хөй-ниитижилери ук хемчегге киржип турган.
Бии-Хемниӊ улуг назылыглар өргээзинде спорт булуӊу, аӊгы интернеттиг компьютерлиг болгаш шыдыраалаар өрээли, бичии ном саӊы болгаш хостуг-шөлээн чугаалажып дыштаныр залдыг.
«Кожууннуӊ пенсионерлериниӊ кадыкшылын, күш-дамырын дадыктырарынга фитнес-тренировка эрттирер, танцылап, ырлап хөглээр чериниӊ бары өөрүнчүг-дүр. Бо төпке чыглып келгеш, омак-сергек эчис сорулгалыг эш-өөрнү тып, амыдыралчы дуржулгаларыӊарны үлежип, солун ужуражылгаларны, мастер-класс кичээлдерни, өөредилгени уштап-баштап организастап турарыӊарны көргеш, Тывага шак мындыг төптерниӊ ажыктыг талазы хөй дээрзин билдивис. Ынчангаш Улуг-Хем биле Чөөн-Хемчик кожууннарга база шак мындыг төптерни ажыдарын планнап турар бис» – деп, Светлана Кенден тайылбырлаан.
«Бии-Хемниӊ улуг назылыгларыныӊ аажок ынак чери бо төп апарган. Хоочуннар чөвүлели, Пенсионерлер эвилели, чогаадыкчы коллективтер маӊаа чыглып келгеш, ужуражып турарлар. Мөӊгүн баштыг өгбелер-биле аралажып чугаалажып, сонуургаар чүүлдерин барымдаалап, онза солун хемчеглерни кады эрттирер аргаларны берип турар» – деп, Орлан Байкара чугаалаан.
«Улуг назылыглар төвү хөй талалыг ажылдап турар. Дөрт аӊгы клуб бар. Суму бүрүзүнүӊ хоочуннар эвилелиниӊ ужуражылгаларын, пенсионерлерге лекцияларны, өөредилгелерни эрттирип турар бис. Кожууннуӊ культура, социал албан черлери-биле кады демниг ажылдап тур бис» – деп, Бии-Хемниӊ улуг назылыглар төвүнүӊ удуртукчузу Любовь Алексеева ажылыныӊ уг-шиин таныштырган.
Суму бүрүзүнде хоочуннар чөвүлели ажылдап турар
Бии-Хем кожууннуӊ пенсионерлери идепкейлиг амыдыралчы туружун көргүзүп, суму бүрүзүнде Хоочуннар чөвүлелин тургузуп алган. Аржаан суурнуӊ «Энелер» деп хоочуннар чөвүлелиниӊ даргазы Урана Моӊгуш чурттап турар сумузунуӊ амыдыралын таныштырып, өӊгүр чараш чуруктарлыг портфолиозун ужуражылга үезинде бараалгаткан. Чоннуӊ амыдыралынга ажык-дузалыг хемчеглер эрттирер методиктиг сүмезин берген.
«Пенсияже үнери дээрге амыдыралдыӊ чаа болгаш онза солун кезээ-дир деп чүүлдү көргүзерин кызып турар бис. Аралажып чугаалажырын, чаа кижилер-биле таныжып алырын, культура, спорт хемчеглеринге киржири дээрге узун назын назылаарыныӊ бир чылдагааны болур деп санаар мен» – деп, хоочун Урана Моӊгуш тайылбырлаан.
Тывада Социал фондунуӊ медээзи-биле Р. Демчик белеткээн.