Хүндүткелдиг улуг назылыг өгбе Наталья Ивановна Маслова – Ада чурттуӊ Улуг дайыныныӊ киржикчизи.
Тываныӊ Баштыӊы Владислав Ховалыг маадырлыг, эрес-дидим энениӊ 100 харлаан юбилейин таварыштыр байыр чедирген.
«Төрүттүнген хүнүн демдеглеп, 100 харлап турар маадырныӊ салым-чолу болгаш амыдыралы эрес-дидим, маадырлыг чоруктуӊ, Төрээн чуртунга бердингениниӊ төлептиг үлегери болур. Ада-чуртун камгалаар, төрээн чериниӊ сайзыралы дээш бүдүрүкчүлүг күш-ажылды кылыр чаа салгалдарныӊ хей-аъдын шак ындыг төөгүлер бедидип чоруур.
Наталья Ивановна Ульяновск областька төрүттүнген. Ада-чурттуӊ Улуг дайыныныӊ чылдарында связист-телеграфист мергежилди өөренип алгаш, Белорусс биле Украин фронтуларга шериг албанын эрттирген. 1945 чылда ону Япон фронтуже чорудупкан. Наталья Ивановнаныӊ ачы-хавыяазын элээн хөй медальдар-биле үнелээн. Оларныӊ аразында «Германияны Тиилээни дээш!», «Дайынчы ачы-хавыяазы дээш!» деп шаӊналдар база бар.
Тывага 1959 чылда чедип келгеш, аӊгы-аӊгы организацияларга ажылдап турган. Повар, санитарка болгаш бөдүүн ажылчын кылдыр ажылдавышаан, ийи ажы-төлүн төлептиг кижилер кылдыр өстүрүп кижизиткен.
Эргим хүндүлүг, Наталья Ивановна! Төрүттүнген хүнүӊер-биле сеткилдиӊ ханызындан байыр чедирип тур бис. Силерге быжыг кадыкшылдыг, омак-сергек болуруӊарны, төрээн болгаш эргим чоок улузуӊарныӊ деткимчези-биле амыр-дыштыг чурттаарыӊарны күзедим!» — деп, Вячеслав Ховалыг социал четкиде блогунга бижээн.
Тываныӊ Чазааныӊ медээлеринден Р. Демчик белеткээн.