«Амгы делегейде улусчу медицина болгаш шажын практиказы: угланыышкыннары болгаш келир үеде хөгжүлдези» деп делегейниӊ эртем конференциязы Кызылда Тубтен Шедруб Линг хүрээзинге болган.
Конференцияныӊ байырлыг ажыдыышкынынга Россияныӊ регионнарыныӊ болгаш делегей чурттарындан чаладып келген эмчилер, эртемденнер, лама башкылар болгаш республиканыӊ чазак-чагырга черлериниӊ төлээлери киришкен.
Күжүгет Шойгу аттыг культура фондузунуӊ Баштаар чериниӊ даргазы Ирина Шойгу байыр чедиргеш: "Делегей чергелиг улуг хемчээлдиг болуушкун Тубтен Шедруб Линг хүрээзинге бир дугаар болуп турар, моон-даа соӊгаар шак ындыг хемчеглер үргүлчү маӊаа болур" – деп, ол дыӊнаткан.
Конференцияга Москва, Санкт-Петербург хоорайдан ат-сураглыг эртемденнер, Россияныӊ регионнарындан лама башкылар, Моолдан, Кыдаттан келген аалчылар болгаш шупту 100 ажыг кижи киришкен.
«Улусчу медицина дээрге келир үеде аажок кедилиг, ажыктыг чүүл-дүр. Россияда херек кырында ажыглап турар аргалар Кыдаттыӊ улусчу эмнээшкиннери-биле дыка дөмей» — деп, Чанчуньнуӊ улусчу кыдат медицина университединиӊ специализи Чжан Маосян чугаалаан.
Тываныӊ Чазак Даргазыныӊ оралакчызы Орлан Сарыглар база ооӊ-биле чүүлдеш бодалын илереткен. Амгы конференцияга медицина эртеминден аӊгыда, чоннуӊ кадыкшылын улусчу эмнээшкин дузазы-биле дадыктырарыныӊ темазын сайгарып көрүп турар болганда, ол чүгле бо республиканыӊ эвес, а ниити чурттуӊ амыдыралынга улуг рольду ойнап турар дээрзин айыткан.
«Тывага улусчу эмнээшкинниӊ аргаларын бурунгу шагдан бээр ажыглап келген. Регионда улусчу медицинаныӊ аргалары дээрге эм оъттар болгаш аржааннар-дыр. Бистиӊ сорулгавыс болза, оларны чонга ажыктыг кылдыр ажыглаары» — деп, Орлан Сарыглар чугаалаан.
Конференцияга бежен ажыг эртем илеткелдерин дыӊнаан. Сарыг шажынныӊ медицина эртеминиӊ философиязыныӊ, культуразыныӊ үндезин билиглерин, улусчу эмнээшкинни амгы үениӊ кадык камгалалы-биле катай ажыглаар аргаларын айтып, сарыг шажынныӊ практиказын болгаш Россия чоннарыныӊ ёзу-чаӊчылында, культуразында улусчу эмнээшкинни өөренириниӊ бойдус эртемнериниӊ көрүжү-биле сайгарган.
Эртем конференциязын Күжүгет Шойгу аттыг культура фондузу, регионнуӊ Чазаа, Сарыг шажынны өөредир болгаш шинчилээринге дузалаар фонд, Тываныӊ күрүне университеди организастаан.
ТМГ медээлеринден Р. ДЕМЧИК очулдурган.
Буян ООРЖАКТЫҢ тырттырган чуруу.
«Шын» №74 2023 чылдың сентябрь 30