Май 11-де Кызылдың А.Б. Чыргал-оол аттыг уран чүүл колледжизинге “Улустуң ырызы” деп регионнар аразынга мөөрей болуп эрткен.
Ийи хонуктуң дургузунда ыры-шоорлуг, оюн-тоглаалыг мөөрейге 80 ажыг киржикчи бүрүткедип, онза салым-чаяанын чыылган чонга база шииткекчилерге таныштырбышаан, адаанныг хемчегни сагыш-сеткилиниң онза хөөнү-биле магаданчыг кылдыр каастааннар.
Аңаа Тыва үндезин культура төвүнүң өөредилге килдизиниң башкызы, “Тыва” бөлүүнүң хөгжүмчүзү база хөөмейжизи Сыдым Кууларның өг-бүлези идепкейлии-биле киржип, I-ги чергениң лауреадының шаңналынга төлептиг болган. Чылдың болуп турар мөөрейниң өг-бүле кежигүннеринден тургустунган бөлүктер аразынга тергиинин илередир кезээнге Кууларларның өг-бүлези тускайланып, кижиниң аас-кежиктиг амыдырал-чуртталгазының үндезини өг-бүледе дээрзин үлегери-биле бадыткааннар.
«Шын» №36 2024 чылдың май 18