Июнь 6-дан 10-га чедир ТР-ниң Алдан-Маадыр аттыг национал музейиниң даштында шөлүнге республиканың ус-шеверлериниң аразынга «Уран балды» мөөрейи болуп эрткен. Кызыл хоорайның чурттакчылары болгаш аалчылары мөөрейниң 8 киржикчизиниң уран-шевер салым-чаяанын магадап, чоон чудуктарның кайгамчык уран чүүлче хуулуушкунун эгезинден доозулгуже магадап көөр аас-кежиктиг болганнар.
Жюри кежигүннери ажылдарда уран-чечен бодал барын, мөөрейниң темазынга дүүшкээн, дүрзүлерниң даштыкы хевирин канчаар сиилбээнин, ниити утка-шынарын, бот-тускайлаңын болгаш өске-даа чазанылга уран чүүлүнүң чугула негелделерин канчаар күүсеткенин үнелеп көргеш, дараазында түңнелди үндүрген:
1-ги черни Аракчаа Ондар «Хамның алгаг-йөрээшкини» («Благословение шамана») деп ажылы-биле ээлээш, 35 муң рубль болгаш «Строймаркет» садыындан бараан алыр бижик-биле шаңнаткан.
2-ги черге «Дайынчы» деп ажылы-биле Аңчы Очур төлептиг болган. Аңаа 25 муң акшаны болгаш «Yoko» садыындан бараан алыр бижикти тывыскан.
3-кү черни Александр Ооржак Надя Рушеваның чуруундан хөөн алганы «Кентавр оглу» деп ажылы-биле ээлээн. Шаңналы: 15 муң рубль, «Мир инструмента» садыындан 5 муң рубльге бараан алыр шаңнал бижик.
4-кү черни Ренат Монгуш «Балерина» деп ажылы-биле чаалап алгаш, бензин-биле ажылдаар хирээни болгаш «House Market» садыындан 3 муң рубль иштинге бараан алыр бижик-биле шаңнаткан.
Арткан киржикчилерге деткикчилерниң белектерин, сертификаттарны тывыскан.
Бистиң корр.
Фоточуруктарны Тыва национал музейниң сайтызындан алган.