Эрткен неделяның кол темазы уругларның айыыл чок чоруу болган. Кажан бис назы четпээн уругларны камгалаар сорулгалыг ажылдың аргаларын болгаш херек кырында чүнү кылып болурун чаартып турувуста, аңаа удур база аар кем-херек үүлгедиишкиннери демдеглеттинген.
Олар шупту хоойлу-дүрүм камгалаар болгаш кем-херек үүлгедиишкиннерин болдурбазының талазы-биле ажылдап турар субъектилерниң талазындан бүгү талалыг хынаар чүүлдери болур. Ынчалза-даа эң-не кол түңнел – назы четпээн уругларга хамаарыштыр болуп турар кем-херек үүлгедиишкиннериниң болуп турар чылдагааннарының хөй кезии өг-бүле иштинде азы арагалаашкынның түңнелинде болуп турар. Ада-иениң харыысалгазын болгаш хөй-ниитиниң хыналдазын күштелдирериниң дугайында шыңгыы боданыр херек дээрзин ол чугаалап турар.
“Канчаарга-даа кем-херек үүлгедиишкиннерин болдурбазы-биле ажылдап турар субъектилерден харыысалганы адырбас мен. Ынчангаш Чазактың аппарат хуралынга база катап ол-ла чүүлдерни демдегледим. Бистиң уругларывыска хамаарыштыр болуп турар кем-херек үүлгедиишкиннери хүн бүрүнүң амыдыралынга турбас ужурлуг. Чазактың социал блогу бодунуң талазындан Россияның чиңгине прокурорунуң оралакчызы Дмитрий Демешинниң болгаш РФ-тиң Президентизиниң уругларның эрге-ажыын камгалаар бүрүн эргелиг төлээзи Мария Львова-Белованың киржилгези-биле болуп эрткен хуралга чедип алдынган шиитпирлерни боттандырар” – деп, Тываның Баштыңы Владислав Ховалыг бодунуң блогунда бижээн.