2025 чылдың сентябрь 1-ден эгелээш республиканың шупту школаларынга Айыыл чок чорук айын чарлаан. «Уруглар, кичээнгейлиг болуңар!» деп акция хоорайның школаларында болуп эртип турар.
Өөредилгениң бирги хүнүнде-ле ОШАЧКИ-ниң инспекторлары аңгы-аңгы школаларның өөреникчилери-биле чугаалашкаш, чадаг кижилерге оруктуң эге дүрүмнерин сагындырып, чайгы дыштанылга үезинде уругларның киржилгези-биле болган орук озал-ондактарының сан-чурагайы-биле таныштырган. Хүннүң-не башкылар уругларның школадан үнериниң мурнунда айыыл чок чоруктуң минуталарын эрттирип турар.
5-9 класстарның өөреникчилери орук шимчээшкининиң дүрүмнериниң дугайында «Школаже айыыл чок оруум» деп өөредиглиг оюнга киржип турар. Бо хемчегниң сорулгазы – чадаг кижилерге болгаш чадаг-тергежилерге орук дүрүмнериниң дугайында билиглерин быжыглаары база орук дүрүмнериниң төөгүзүн болгаш ажыглалының дугайында билиглерин калбартыры.
10-11 класстарның өөреникчилери орук шимчээшкининиң дүрүмнериниң дугайында викториналарга күзелдии-биле киржип турары өөрүнчүг.
Дараазында дүрүмнерни сагыыры чугула: орук кежерде, тура дүшкеш, ол-бо талазынче хынамчалыг көр. Кайы-даа таладан айыыл чогун ылавылап алгаш, орукту кеш. Тургузуп каан автомобильдиң артындан эртерде, оваарымчалыг бол. Чолаачы бар бе, чок бе, халдып үнер байдал бар бе, хынамчалыг көр. Халдып олурар автомашинаның мурнундан орукту кажан-даа кежир халыва. Орук кежерде, телефон тутпа, эш-өөрүң-биле чугаалашпа, бүгү кичээнгейиң чүгле орукта болзун. Орук кежерде, капюшонуңну уштуп ал. Сени долгандыр айыылдыг байдал диргелип келирге, дыңнавайн барып болур сен.
Эртениң-не Кызыл хоорайның М.А. Бухтуев аттыг 1 дугаар школазынче 1-ги классчы оглум чедирип чорааш, школаның баарында чадаг кижи кежер орукта ук школаның өөреникчилери башкылары-биле кады дежурныйлап турарын көөрге, өөрүнчүг чорду. Олар бир дугаар кичээлдиң коңгазы эдер бетинге чедир орук кыдыынга турар. Оруктуң кыдыын дургаар өңнүг бижиктер туткан ажы-төл талыгырдан-на чолаачыларга көстүп кээр. Ынчангаш олар ол кезек черни кончуг оожум халдып эртип турарын эскердим. Чүгле бо школада эвес, а өске-даа школаларның башкылары, өөреникчилери чарлаттынган акцияда идепкейлии-биле киржип турарын эскердим.
Айдың ОНДАР.
Чурукту интернет четкизинден хоолгалаан.
“Шын” №37 2025 чылдың сентябрь 25