2024 чыл Россияда ɵг-бүле чылы кылдыр чарлаттынган. Ɵг-бүле – өртемчейде эӊ-не эргим, чылыг, чырык ол дег үнелиг чүве чок. Бо чылда чаштар болгаш элээдилер номнарыныӊ байырлалыныӊ темазы «Номчуттунар өг-бүле – номчуур чурт».
Уруглар номунуӊ байырлалынга тураскааткан «Лукоморьеже аян-чорук» (Дугаланчак далай эриинче аян-чорук) деп сценажыткан оюн-көргүзүг часкы дыштанылга үезинде Республиканыӊ К.И. Чуковский аттыг уругларның ном саӊынга болуп эрткен. Бо хемчегге хамаарышкан янзы-бүрү ужуражылгалар, солун кичээлдер, мастер-класстар, викториналар, квест-оюннар, номнар делгелгелери барык неделя дургузунда уламчылаар. Сценажыткан оюн-кɵргүзүгнү ном саңының ажылдакчылары солун ойнап күүсеткен.
Ук хемчегге чалаткан аалчыларга аныяк чогаалчылар Менги Ооржак, Светлана Ондар, номчуттунарынга ынак Роля, Сайдаш Шараптарның ɵг-бүлези хамааржыр. «Матпадак» болгаш «Самага» ансамблиниӊ бичии артистери чараш ырылары-биле көрүкчүлерни кайгадып, аян туткан. Бо байырлалга ниитизи-биле өɵреникчилер, башкылар, ада-иелер шупту чүс ажыг кижи хаара туттунган. Оларныӊ аразында бир, ийи, беш, чеди, он беш дугаар школаларныӊ ɵөреникчилери бар. Эӊ-не идепкейжи номчукчуларны мактал бижиктер-биле шаӊнаан.
К.И. Чуковский аттыг уругларның ном саңы.
«Шын» №25 2024 чылдың апрель 3