Тываның Баштыңы Владислав Ховалыг муниципалитеттер удуртукчуларындан чаагайжыттынмаан черлерни аайлаарын негээн.
«Таарымчалыг хоорай хүрээлеңин хевирлээри» төлевилелге аңгы-аңгы чылдарда киришкен черлерге эрткен неделяда четкеш, тус чер чагыргалары туттунган дыштанылга инфраструктуразының объектилерин хайгаарал чокка октапкан-дыр деп түңнелди кылган.
Владислав Ховалыг чижек кылдыр Кызылда спортчу шөлдерни айыткан. Ооң сөзү-биле алырга, оларның байдалы санчок. Дыка хөй шөлдерни үрегдеп каапкан, ажылдавайн турар. Чижээ, баскетбол шөлдеринде бөмбүк киир октаар дээрбени одура тыртып, дыштаныр зоналарның херимнерин үреп, будуктарын сүвүрүп каапкан ийикпе, азы оңуп каан дээш оон-даа өске.
Бир талазында, хөй-ниити черлери ол хире херектиг болганын көргүзүп турар деп республика Баштыңы чугаалаан. Кижилерниң хөй ажыглаанындан ол элеп, баштайгы хевирин чидирипкен деп болур. Ындыг болзажок, ол объектилерни өнчүзүнче хүлээнип алган тус чер бот-башкарылга органнарының тоомча чок чоруун көргүзүп турар. Байырлыы-биле ажыткаш, эртенинде-ле уттупкан хевирлиг.
Владислав Ховалыг хөй-ниити черлерин аайлаар негелдени тус чер баштыңнарының мурнунга тургускан. «Таарымчалыг хоорай хүрээлеңин хевирлээри» төлевилел шугуму-биле 2017 чылдан тура Кызылда 29, ниитизи-биле 145 шөлдү чаагайжытканы, ам кылыр ажылдың улуунуң херечизи. Өске программа-биле туттунган шөлдер база тудуглар хөй.
Регионалдыг яамылар болгаш ведомстволар коллективтери хоорай мэриязынга дузалажып, субботниктерже үнеринге беленин республика Баштыңы чугаалаан. Муниципалитеттер эрге-чагыргалары девискээрлерни ажаап-тудуп база септээр ажылды ам доктаамал хандырар боор деп, Владислав Ховалыг айыткан.
ТР-ниң Чазааның парлалга албаны
«Шын» №40 2024 чылдың июнь 1